PDK kishte propozuar para 2 vitesh të njëjtën zgjidhje për Demarkacionin

Marrëveshja e Shënimit të Kufirit me Malin e Zi ka gjasa të ratifikohet në Kuvend, dhe atë vetëm pasi presidenti i vendit, Hashim Thaçi ka nënshkruar një marrëveshje me homologun e tij malazez, marrëveshje që mundëson rishikimin e çdo pretendimi për devijim në vijën kufitare.

Por kjo marrëveshje duket se nuk është shpikje e këtij viti. Një e tillë ishte propozuar në vitin 2016 nga Partia Demokratike e Kosovës, si model zgjidhje dhe pajtimi mes forcave politike.

Në atë kohë një pjesë e LDK-së, që e drejtonte qeverinë nuk e përkrahte marrëveshjen e nënshkruar në Vjenë e ndërkaq AAK-ja, NISMA dhe Vetëvendosje tentonin me çdo kusht të bllokonin punën e Kuvendit me gaz lotsjellës, vezë si dhe me protesta.

Siç kishte raportuar Koha Ditore në gusht të vitit 2016, njëri version është deklaratë pajtimi në mes dy vendeve. Tjetri është aneks i Marrëveshjes së 26 gushtit të vjetëm. I treti përbën deklaratë të përbashkët mes kuvendeve të Kosovës e Malit të Zi.

Nëse asnjëri nga tri versionet nuk do të mbështetej nga Podgorica zyrtare, nëpërmjet versionit të katërt është paraparë zgjidhje e njëanshme – nxjerrja e një vendimi nga Kuvendi i Kosovës.

Këto propozime nuk ishin marrë fare parasysh, as nga partitë opozitare të asaj kohe, e të cilat sot edhe po e përkrahin marrëveshje të njëjtë.