E mërkura mund të jetë tragjedi politike për Kosovën

E mërkura e javës së ardhshme mund të shënoj një tragjedi politike për Kosovën, dhe integrimin e saj në proceset evropiane.

Kjo ngase as të mërkurën nuk pritet që të ratifikohet marrëveshja e demarkacionit me Malin e Zi.

Kjo do ketë pasoja për Kosovën, të cilën në po të njëjtën ditë kur do mbahet seanca, do e vizitojnë edhe krerët kryesor të Evropës.

Presidenti i Komisionit Evropian, Jean-Claude Juncker, shefja për Politikë të Jashtme dhe Siguri e BE-së, Federica Mogherini dhe Komisionari për Zgjerim, Johannes Hahn, do të qëndrojnë të mërkurën në Kosovë, ku edhe presin rezultate konkrete nga demarkacioni.

Mirëpo njohës të çështjeve politike në vend, janë skeptikë që deri të mërkurën do të bëhet një zgjidhje për marrëveshjen e kufirit.

Naim Rashiti i ka thënë Gazetës Blic, se as e mërkura nuk do i jap epilog kësaj çështje.

Rashiti ka thënë se vendi është ende shumë larg arritjes së një marrëveshje që do e finalizonte demarkimin.

“Nuk kalon demarkacioni pa marrëveshje, Tash jemi ende shumë larg” ka thënë Rashiti.

Në të njëjtën linjë është edhe njohësi i marrëdhënieve ndërkombëtare Avni Mazreku.

Në një prononcim për Gazetën Blic, Mazreku ka thënë se mos kalimi i kësaj marrëveshje ditën e mërkurë, do të jetë një tragjedi e dyfishtë për politikën kosovare.

Mirëpo ka thënë se dëshiron të besoj që deri atë ditë, të arrishet konsensusi.

“Unë mendoj se ardhja e këtij delegacioni në Kosovë do të ketë ndikim, nga ana tjetër nëse as ardhja e këtij delegacioni në Kosovë nuk do të ketë efekt, kjo do të jetë një tragjedi e dyfishtë politike për Kosovën” ka thënë Mazreku.

Ai ka thënë se Kosova është duke u ndëshkuar për ngecjen që ka bërë tash e sa vite me këtë marrëveshje, dhe mos ratifikimi as javën e ardhshme do të ketë pasoja.

Edhe Rashiti e edhe Mazreku e kanë vlerësuar si jo korrekte dhe aspak serioze sjelljen e përfaqësuesve politik të cilët që dy ditë radhazi kanë thirrur seancë për këtë marrëveshje, ndërsa nuk kanë arritur as ta hedhin në votim marrëveshjen.

Kuvendi mblidhet për seancë të jashtëzakonshme për demarkacionin të mërkurën në orën 10:00, ndërsa delegacioni evropian pritet që në Kosovë të arrijë pasdite./GazetaBlic/