Vdes mamia llapjane Sanije Topanica, iu ndihmoi grave në lindje gjatë luftës
A ishte futja në listë të zezë e deputetëve të Speciales paralajmërimi i Delawie?
Ndëshkimi i parë ndaj 43 deputetëve të Kuvendit të Kosovës, të cilët po bëjnë përpjekje për ta shfuqizuar Gjykatën Speciale, tashmë ka ndodhur. Me gjasë, paralajmërimet e ambasadorëve të huaj se ata që e bënë këtë hap do të përballen me pasoja specifike, është vënë në veprim. Siç ka mësuar Gazeta Express nga burimet diplomatike, emrat e 43 prej tyre kanë hyrë në një listë të zezë të përpiluar nga shtetet mike të Kosovës duke iu pamundësuar atyre marrja e vizave. Por, deputetët mohojnë të ketë ndodhur kjo. Thonë se nuk janë në dijeni për këtë situatë.
Më 22 dhjetor të vitit të kaluar, një grup i deputetëve të Kuvendit të Kosovës pati ndërmarrë një nismë për shfuqizimin e Gjykatës Speciale që do t’i gjykonte krimet e luftës. Kjo nismë e cila zgjoi reagimin e ashpër të ndërkombëtarëve dhe thirrjeve të vazhdueshme të tyre që t’i jepej fund kësaj iniciative, nuk rezultoi me sukses. Megjithatë e njëjta është proceduar në Qeveri.
Ambasadori amerikan Greg Delawie i kishte paralajmëruar të gjithë ata që janë pro shfuqizimit të kësaj gjykate se do të përballeshin me pasoja specifike. E hiç më larg se të mërkurën mbrëma, Express kishte mësuar nga burimet diplomatike, se emrat e 43 deputetëve kanë hyrë në një listë të zezë të përpiluar nga shtetet mike të Kosovës që të mos kenë mundësi pajisjen me viza. Ky vendim është marrë pasi këta deputetë kanë dalë kundër qëndrimeve të Ambasadave, që përfaqësojnë shtetet më të fuqishme në vend.
Por ligjvënësit e vendit, nuk kanë pranuar ta komentojnë për Express këtë situatë. Thonë se nuk janë në dijeni dhe as nuk e presin këtë veprim për viza.
Memli Krasniqi, shef i grupit parlamentar të PDK’së, i cili edhe është në mesin e atyre që kanë nënshkruar, nuk e ka komentuar shumë këtë çështje. Ai shkurtimisht ka thënë se këto janë spekulime që nuk kanë adresa. “Nuk ka pas burim. Nuk mundem me komentu kurgjo për spekulime dhe deklarime pa adresa”, tha ai.
E njëri nga më të zëshmit dhe që e kundërshton fuqishëm gjykatën Speciale, Daut Haradinaj, thotë për Express se nuk ka informatë të tillë. Por që e bën të qartë se nuk zmbrapset ndaj nënshkrimit të tij. “ Nuk kam asnjë informatë për diçka të tillë që ju po e parashtroni. Unë jam deputet i Kuvendit të Kosovës, i zgjedhur nga populli dhe ushtroj funksionin tim vetëm në përputhje me ligjet dhe kushtetutën e vendi tim”, është shprehur Haradinaj, ndonëse thotë se nuk ndjehet i penduar për nënshkrimin e tij dhe se të njëjtën e ka bërë edhe para tre vitesh.
Njësoj, nuk e kanë komentusar gajtë këtë situatë as dy deputetë tjerë. Haxhi Shala nga Nisma sikurse edhe Andin Hoti nga PDK. Të dytë, kanë thënë se nuk kanë informata zyrtare për punën e vizave dhe listën e zezë.
Express ka provuar të marrë përgjigje edhe nga deputetë tjerë që kanë dhënë nënshkrimin e tyre kundër Speciales, por të njëjtët nuk janë përgjigjur.
Sidoqoftë, Kryesia e Kuvendit ka marrë vendim që nisma për shfuqizimin e Ligjit për Dhomat e Specializuar të dërgohet në Qeveri dhe se kjo e fundit i ka 30 ditë afat që të jap mendim.
Nait Hasani, Nezir Çoçaj, Luljeta Veselaj Gutaj, Xhevahire Izmaku, Abdyl Salihu, Fadil Beka, Ganimete Musliu, Flora Brovina, Mergim Lushtaku, Sala Berisha Shala, Memli Krasniqi, Emilja Redzepi, Etem Arifi, Duda Balje, Albert Kinolli, Bahrim Shabani, Danush Ademi, Shkumbin Demaliaj, Ahmet Isufi, Teuta Haxhiu, Time Kadriaj, Rasim Selmanaj, Bekë Berisha, Blerim Kuçi, Gani Dreshaj, Muharrem Nitaj, Daut Haradinaj, Bekim Haxhiu, Hajdar Beqa, Evgjeni Thaçi Dragusha, Mexheide Mjaku Topalli, Blerta Deliu Kodra, Safete Hadërgjonaj, Andin Hoti, Zenun Pajaziti, Milaim Zeka, Enver Hoti, Albulana Balaj Halimaj, Zafir Berisha, Haxhi Shala, Bilall Sherifi, Islam Pacolli dhe Labinot Tahiri dhanë nënshkrimet për të kërkuar shfuqizimin e Speciales./GazetaExpress/
