Demarkacioni në Kuvend, në muajin shkurt?

Marrëveshjaj për Demarkacion e kufirit ndërmjet Kosovës dhe Malit të Zi, nuk pritet që të procedohet në Kuvend as brenda këtij muaji, pasi që Komisioni Parlamentar për Punë të jashtme ende nuk ka vendosur nëse do t’ia përcjellë Kryesisë së Kuvendit këtë marrëveshje me një propozim konkret.

Çështja e demarkacionit, që i ka sfiduar deputetët që nga viti 2015 po i mban të ndarë në qëndrime edhe më tutje deputetët e Kuvendit të Kosovës dhe anëtarët e Komisionit Parlamentar për Punë të jashtme, të cilët kanë shprehur qëndrime të ndryshme karshi kësaj marrëveshje. Kështu ishin deklaruar në mbledhen e kaluar që është mbajtur më 15 janar, ndërsa rivotim të marrëveshjes nuk dihet nëse do të ketë. Të paktën kështu u deklarua për “Gazeta Blic” anëtari i këtij komisioni nga radhët e PDK-së, Elmi Reqica.

“Ne kemi pasur një takim por nuk e kemi votuar marrëveshjen që më pas ajo të procedohet në Kryesi të Kuvendit siç e do rendi dhe ligji, dhe nuk kam informacion nëse komisioni parlamentar do ta rikthej edhe njëherë në votim marrëveshje dhe për këtë e di sigurisht vetëm kryetarja”, tha Reqica.

Ndërkohë “Gazeta Blic” ka bërë përpjekje disa herë që të kontaktoi me kryetaren e këtij komisioni Parlamentar, Vjosa Osmani por ajo nuk është përgjigjur në thirrjet e redaksisë.

Në anën tjetër Kryeparlamentari Kadri Veseli, ka bërë të ditur se marrëveshja për Demarkacion nuk do të dërgohet në Kuvend për ratifikim në seancën e parë të sesionit pranveror e cila do të mbahet më 25 janar, për shkak që sipas tij Komisioni Parlamentar për Punë të Jashtmë është vonuar në procedimin e saj në Kryesi të Kuvendit.

“Nuk do ta kemi në seancë plenare pasi Komisioni Parlamentar nuk e ka sjellë në kohën e duhur që të trajtohet në këtë mbledhje të kryesisë kështuqë nuk do të jetë në seancën e ardhshme. Presim të procedojmë gjithsesi pasi tani e kemi vetëm qëndrimin po për këtë mbledhje nuk ka qenë e përgatitur”, tha Veseli, pas përfundimit të mbledhjes së djeshme të Kryesisë së Kuvendit.

E një burim i “Gazeta Blic” brenda koalicionit qeverisës “PANA” i ka thënë portalit se në fillim të muajit shkurt do t’i japin epilog kësaj çështje.

“Marrëveshja për Demarkacion ndërmjet Kosovës dhe Malit të Zi, do të procedohet në Kuvend në fillim të muajit të ardhshëm dhe do të përmbyllet përfundimisht, për t’i hapur rrugë liberalizimit të vizave dhe anëtarsimin e vendit në organizata të ndryshme ndërkombëtare me qëllim të zhvillimit të vendit tonë”, tha ky burim.

Mosratifikimi i Demarkacionit me Malin e Zi gjatë këtij muaji, vlerësohet se do ta zgjas edhe më tepër izolimin e qytetarëve. Nëse në janar nuk ratifikohet kjo marrëveshje proceduralisht autoritet në Kosovë rrezikojnë ta humbin shansin që në 2018 të mund të lëvizin pa viza.

Nezir Kraki, ligjërues i shkencave politike në Universitetin e Parisit, ka vlerësuar për “Gazeta Blic” se dështimi i ratifikimit të marrëveshjes së Demarkacionit me Malin e Zi, do ta krijonte një cikël të ri bllokimi edhe për të paktën dy vjet të tjera.

“Të gjitha vonesat që janë shkaktuar në qeverisjen e kaluar, siç është edhe mos ratifikimi i Demarkacionit me Malin e Zi, ngecja ne bisedimet me Serbinë, pra të gjitha këto dosje të mëdha që e kanë bllokuar Kosovën, do të futen në një cikël të ri bllokimi edhe ndoshta për dy vjet të ardhshme”, ka deklaruar ai.

Ndryshe, marrëveshja për Demarkacion është kundërshtuar vazhdimit nga AAK dhe Vetëvendosje që nga nënshkrimi i saj në Vjenë në gusht të vitit 2015. Këto subjekte politike, kundërshtimin e tyre e kanë arsyetuar se marrëveshja e Vjenës i humb Kosovës rreth 10 mijë hektarë territor.

Deputetët e opozitës nga legjislatura e kaluar, pretendonin se me Marrëveshjen e vitit 2015, për shënjimin e vijës kufitare me Malin e Zi, Kosova ka humbur mbi 8 mijë hektarë territor. Pjesë e opozitës së atëhershme ishte edhe kryeministri aktual, Ramush Haradinaj, i cili njihet për kundërshtimin e versionit të marrëveshjes aktuale për Demarkacionin me Malin e Zi.

Ratifikimi i Marrëveshjes për Demarkacionin e kufirit me Malin e Zi, besohet se po e mban peng procesin e liberalizimit të vizave për qytetarët e Kosovës, ngase Komisioni Evropian e ka vënë atë si kusht që Kosova duhet ta përmbushë për heqjen e vizave./Gazeta Blic/