Një person tenton të futet dhunshëm në Ambasadën Amerikane: Kush jeni ju që s’lëshoni viza

Në orët e djeshme të pasdites, një person ka tentuar të futet dhunshëm në objektin e Ambasadës Amerikane në Dragodan. Ai u pengua nga pjesëtarët e sigurimit, të cilët nga distanca tentuan ta pengojnë hyrjen e tij brenda hapësirës së Ambasadës. Ata e patën të vështirë të neutralizojnë atë, pasi dyshonin se mund të jetë i armatosur. Kësisoj u kërkua ndihma e Policisë së Kosovës, të cilët e arrestuan të dyshuarin.

Gjatë pasdites së djeshme, një person tentoi të futet me dhunë në objektin e Ambasadës Amerikane në Prishtinë.

Ai u pengua nga pjesëtarët e sigurimit të Ambasadës.

Burime të Periskopit bëjnë të ditur se personi i dyshuar kishte filluar të ofendojë e të bërtas para Ambasadës.

“Nanën, kush jeni ju që nuk jepni viza”, kishte bërtitur i dyshuari, i cili mezi arriti të neutralizohet nga Policia e Kosovës, të cilët përdorën edhe sprej ndaj tij.

Se një incident ka ndodhur dje pasdite, e konfirmoi edhe zëdhënësi i Ambasadës së SHBA-së në Prishtinë, Richard Mei.

Në përgjigjen e tij, ai shkruan se ‘një individ me sjellje të çuditshme shkaktoi një incident të vogël para ambasadës së SHBA-ve në Prishtinë me 9 janar’.

Tutje, ai tregon se me këtë rast u mor Policia e Kosovës.

Ndërhyrja e Policisë kishte qenë e domosdoshme, pasi pjesëtarët e sigurimit nuk kishin njohuri nëse i dyshuari kishte qenë i armatosur, apo çfarë pretendimesh kishte.

Mënyra e vetme për ta neutralizuar të dyshuarin ishte duke hedhur sprej në sy. Më pas, ai u arrestua.

Identiteti i të dyshuarit nuk dihet. As pretendimet e tij.

Për këtë rast, u kontaktuan disa herë edhe zyrtarët policorë, por ata ende nuk kanë dhënë përgjigje lidhur me këtë rast.

Ky rast ndodhi vetëm pak ditë pasi u raportua se Ambasada Amerikane ia ka refuzuar vizën kryeministrit të Kosovës, Ramush Haradinaj.

Haradinaj është kryeministri i parë i vendit që nuk ishte pajisur me vizë amerikane për vizita zyrtare në ShBA.

Në një përgjigje për media lidhur me këtë rast, zëdhënësi i Ambasadës Amerikane Richard Mei kishte thënë se nuk mund ta komentoj rastin për shkak të privatësisë së të dhënave.

“Ambasada nuk komenton në raste individuale të vizave për shkak të ligjeve tona të privatësisë të të dhënave”, kishte thënë ai.

Për këtë çështje, kishte folur edhe vetë kryeministri Haradinaj.

Ai kishte thënë se është në pritje të vizës amerikane në mënyrë që të mund të udhëtoj në ShBA lidhur me lutjet e mëngjesit, ndërkohë që nuk kishte arritur të shkojë në SHBA për disa takime që kishte pasur në shtetin e Lëoa-s, pasi ende nuk e kishte marrë përgjigjen për vizë amerikane.