Matoshi: Kryeministri Haradinaj, nuk do ta procedojë Demarkacionin në Kuvend pa u konsultuar me krerët institucional

Kryeministri i Kosovës Ramush Haradinaj, nuk do të jetë në gjendje që të procedoi për në Kuvendin e Kosovës versionin e ri të Demarkacionit me Malin e Zi, i cili do të presentohet nesër para Qeverisë, pa u konsultuar me krerët institucional të vendit, Presidentin Hashim Thaçi dhe Kryeparlamentarin Kadri Veseli.

Kështu ka bërë të ditur për “Gazeta Blic” zëdhënesi i Qeverisë së Kosovës, Halil Matoshi. Sipas tij, pas raportimit të Komisioni Shtetëror për shënjimin dhe mirëmbajtjen e kufirit shtetëror për të gjeturat e reja lidhur me demarkacionin e kufirit me Malin e Zi, Kryeministri Haradinaj dë mbajë konsultime me krerët insntitucional për mënyrën se si duhet vepruar.

“Komisioni shtëtror do të raportojë nesër para Qeverisë së Kosovës dhe Kryeministri Haradinaj, së bashku me kabinetin qeveritar do të ketë konsultime me krerët institucional të vendit për hapat e më tutjeshëm”, tha Matoshi, raporton GazetaBlic.com

Ndërkaq për versionin aktual të marrëveshjes për Demarkacion me Malin e Zi, Matoshi nuk sheh gjasa që do të ratifikohet në Kuvendin e Kosovës, pasi që sipas tij, ky version si i tillë nuk e ka mbështetjen e shumicës parlamentare.

“Versioni i vjetër apsulutisht nuk e ka shumicën prej dy të tretave dhe ai në bazë të të gjitha gjasave do të rrëzohet si version”, u shpreh ai.

I pyetur nga “Gazeta Blic” se a do të jetë java e ardhshme, koha kur do të ndodh procedimi i Demarkacionit në Kuvend, Matoshi nuk që në gjendej që të jap një deklaratë konkrete, duke thënë se duhet ende kohë “për konsultime shtesë ndërinstitucionale”

Pritjet janë që Qeveria e Kosovës bashkë me raportin e Komisionit, ta procedojnë edhe Projektligjin për ratifikimin e Marrëveshjes për demarkacionin në Kuvend, në mënyrë që ky institucion të marrë vendim, nëse do ta ratifikojë apo anulojë këtë marrëveshje.

Marrëveshja për demarkacionin e kufirit me Malin e Zi është nënshkruar nga autoritetet e Prishtinës dhe Podgoricës, në fund të gushtit të vitit 2015, në Vjenë.

Pas ardhjes në krye të Qeverisë së Kosovës, kryeministri Ramush Haradinaj, i cili në legjislaturën e kaluar kishte kundërshtuar ratifikimin e Marrëveshjes për demarkacion me Malin e Zi, ka shkarkuar përbërjen e Komisionit shtetëror për shënjimin dhe mirëmbajtjen e kufirit shtetëror që drejtohej nga Murat Meha, duke emëruar përbërje të re me në krye Shpëtim Bulliqin.

/Gazeta Blic/