Anëtarët e LDK-së në Komisionin për Buxhet dhe Financa sot kanë votuar kundër rishikimit të Buxhetit të Kosovës.

Kryesuesi i këtij Komisioni, deputeti i LDK-së, Lumir Abdixhiku, ka përmendur heqjen e fondit të sigurimeve shëndetësore si një nga arsyet pse LDK ka votuar kundër rishikimit buxhetor.

Por, Ministri Ismaili, në një postim në llogarinë e tij në Facebook, ka rikujtuar se LDK ka drejtuar Ministrinë e Shëndetësisë dhe Ministrinë e Financave.

“Në Komisionin për Buxhet dhe Financa, LDK ka votuar sot kundër rishikimit të Buxhetit të Kosovës, duke përmendur si një nga arsyet heqjen e fondeve për sigurimet shëndetësore. Por, është e pandershme dhe e papërgjegjshme të tejkalohet fakti se sigurimet shëndetësore nuk janë arritur ekskluzivisht për shkak të neglizhencës së ministrave të LDK-së në qeverisjen e kaluar. Po jua kujtoj se LDK ka drejtuar Ministrinë e Shëndetësisë dhe Ministrinë e Financave”, ka shkruar Ismaili.

Ai, po ashtu, ka garantuar se buxheti për shëndetësinë do të rritet në vitin 2018, ashtu siç ka siguruar se shërbimet shëndetësore do të përmirësohen dukshëm.

“Të gjithë do të jenë dëshmitarë të një panorame krejt ndryshe të shëndetësisë kosovare”, ka shkruar Ministri Ismaili./express