Albert Krasniqi, hulumtues në Institutin Demokratik të Kosovës (KDI), sqaron se në cilat raste kanë imunitet deputetët.

Deputeti i Nismës për Kosovën, Milaim Zeka, pasditen e së hënës u ndalua nga Policia. Ndalimi i tij ka ndodhur pas dyshimeve se ka qenë i përfshirë në një skemë mashtrimi me viza pune në Gjermani për 920 kosovarë. Pas kësaj, Gjykata sot vendosi që Zekës t’ia shqiptojë masën e arrestit shtëpiak në kohëzgjatje prej një muaji.

Por, a mund ta humbë Zeka vendin e deputetit në Kuvendin e Kosovës?

Albert Krasniqi, nga KDI ka sqaruar për Express të martën se deputetët e Kuvendit kanë vetëm imunitet funksional, që nënkupton vetëm për veprimet e tyre në cilësinë e deputetit.

“Për veprimet tjera nuk kane imunitet dhe mund të ndalohen dhe arrestohen nga organet e drejtësisë në çdo kohe, me përjashtim kur janë duke i kryer punët e tyre si deputetë”, u shpreh Krasniqi.

Hulumtuesi i KDI’së që monitoron punën e Kuvendit shtoi se nëse Zeka dënohet me burgim për një vit ose më shumë, në atë rast e humb mandatin e deputetit.

“Edhe nëse mungon në Kuvend pa arsye për me shume se gjashtë muaj. Por, për këtë duhet të votojë shumica e të gjithë deputeteve”, shpjegoi ai.

Sidoqoftë, nëse Milaim Zeka dënohet për veprat për të cilat tashmë është i dyshuar, vendin mund t’ia zë Rafet Rama, i cili në bazë të rezultatit të zgjedhjeve të fundit ka 8.821 vota.

Zekës i është shqiptuar masa e arrestit shtëpiak prej një muaji si i dyshuar për veprën penale “pjesëmarrja ose organizimi i grupit kriminal të organizuar” nga neni 283 paragrafi 1, lidhur me veprat penale “mashtrimi” nga neni 335 paragrafi 5 lidhur me paragrafin 1 të KPRK’së, si dhe “shmangia nga tatimi” nga neni 313 paragrafi 3 lidhur me paragrafin 1 të KPRK’së.

Në bazë të kodit penal të Republikës së Kosovës veprat për të cilat dyshohet t’i ketë kryer Milaim Zeka sipas Kodit penal për veprën e krimit të organizuar mund të dënohet prej 4-7 vite, ose t’i shqiptohet gjobë mbi 250 mijë.

Për veprën penale mashtrim, neni 335 nga paragrafi 5, i dyshuari, deputeti Milaim Zeka, mund të dënohet me gjobë dhe me burgim prej tre (3) deri në dhjetë (10) vjet./Gazeta Exppress