Avokati i Popullit: Qendrat sociale për fëmijët me aftësi të kufizuara rrezikojnë të mbyllen

Avokati i Popullit, Hilmi Jashari, dje gjatë ditës ka vizituar organizatën joqeveritare  “PEMA” me seli në Prishtinë, e cila merret me fëmijët me aftësi të kufizuara, lidhur me vështirësitë dhe situatën aktuale me të cilat ballafaqohet ajo.

Në komunikatën e lëshuar për media nga Avokati i Popullit, thuhet se për shkak të vështirësive financiare qendrat në komunën e Ferizajt, Pejës, Gjilanit dhe Prizrenit rrezikojnë të mbyllen, raporton Insajderi.

“Fëmijët me aftësi të kufizuara përballen me vështirësi dhe barriera të shumta në të gjitha fushat e jetës, përfshirë këtu gëzimin e së drejtës për shërbime sociale varësisht nga nevojat”, ka thënë Hilmi Jashari gjatë vizitës së tij në organizatën “PEMA”, e cila është licencuar nga Ministria për Punë dhe Mirëqenie Sociale.

Problemet më të cilat ballafaqohen këto qendra janë infrastruktura joadekuate shkollore, mungesë të asistentëve personalë, mësuesve mbështetës e shumë herë edhe të planeve individuale arsimore, gjë që ua mohon atyre gëzimin e plotë të së drejtës për arsim cilësor, gjithëpërfshirës, ashtu si është përcaktuar me ligj.

Avokati i Popullit ka ftuar  autoritetet qendrore, komunale, por edhe të tjerët që mund të ndihmojnë në këtë aspekt, që këtyre qendrave t’u ofrojnë mbështetjen e nevojshme, përfshirë këtu edhe atë financiare, që ato të vazhdojnë punën dhe fëmijëve t’u ofrohet ndihma dhe shërbimet përkatëse sociale./Insajderi.com