Shpejtim Bulliqi, kryesuesi i Komisionit shtetëror për Shënjimin dhe Mirëmbajtjen e Kufirit Shtetëror, thotë se po punojnë me kapacitete të plota por se u duhet kohë optimale për të shqyrtuar dokumentet dhe faktet ekzistuese në lidhje me shënjimin e vijës së kufirit ndërmjet Kosovës dhe Malit të Zi.

Për televizionin publik Bulliqi tha se është herët të flitet për rezultatet e gjetjeve të deritanishme sepse ka ende gjëra që duhet verifikuar. Por, tha se kanë gjetur çalime në punën e komisionit paraprak.

“Të gjeturat e para tregojnë se ka çalime në punën e Komisionit Shtetëror për Demarkacion”, tha Bulliqi.

Ai nuk ka afat kohor kur do të dalin me raportin të cilin do t’ia dorëzojnë Kryeministrit Ramush Haradinaj.

“Janë tre fusha esenciale që duhet të analizohen dhe për këtë neve na nevojitet kohë. Ne faktikisht nuk e kemi një periudhë të caktuar kohore. Thuhet se brenda një kohe optimale besoj që do të bëjmë të pamundurën që të sa më shpejt që është e mundshme t’i grumbullojmë të gjitha këto fakte, t’i argumentojmë të gjitha këto fakte edhe në një farë forme të formojmë një raport së bashku me rekomandimin e kryeministrit të vendit. Është një periudhë optimale, nuk guxojmë të lidhemi me ditë…Nuk guxojmë të lidhemi për një periudhë të caktuar strikte, është optimale ne jemi duke punu me kapacitete të plota”, theksoi ai.

Ndërkohë Mali i Zi ka deklaruar se çështja e Demarkacionit me Kosovën për vendin e tyre është çështje e mbyllur./Express/