Me shuarjen e Sandra Casey humbet një mësuese e shkëlqyer.

Jenny Parks u qëllua bashkë me të shoqin. Ajo vdiq në vend, ndërsa ai po i nënshtrohet ndërhyrjeve kirurgjikale.

Viktimat e Las Vegasit e kanë një fytyrë dhe një histori. Shumica e të identifikuarve deri tani janë të rinj, viktima të marrëzisë së një njeriu, të cilin nuk e kanë njohur kurrë. Mes lotësh, njerëzit kanë ndezur qirinj për këtë humbje të pakuptimtë jetësh, ndërsa të mbijetuarit rrëfejnë momentet e tmerrit.

Pjesa dërrmuese, në fillim nuk e kuptoi fare se çfarë po ndodhte.

“Kur filluan të shtënat mendova se ishin fishekzjarre. Pastaj pashë njerëzit të hidheshin në tokë e më kapi frika. Ishte e tmerrshme. Nuk e dinim nga qëllohej, menduam se mos ishte dikush në mesin e turmës. Mendojeni vetë: Je i rrethuar nga mijëra njerëz e nuk e di se kush po shtin mbi ty. Ishte e frikshme”, tha Tom Mcintosh.

Lajmi se agresorit iu gjetën mbi 40 armë, shumica të blera në mënyrë të rregullt, rindezi shpejt debatin e fjetur të kontrollit mbi armët e zjarrit në Shtetet e Bashkuara. Demokratët kërkojnë ligje të forta, republikanët heshtin./Express/