Ai thotë se dëgjoi me vëmendje shqetësimet e grupeve parlamentare të shprehura sot në fillim të seancës plenare.

Ai, ndër të tjera, iu përgjigj edhe deputetit të Lëvizjes Vetëvendosje, Dardan Molliqaj, i cili solli në Kuvend temën mbi rastin e vdekjes së aktivistit të VV-së, Astrit Dehari.

“Nuk dua të bëj presion apo ndërhyrje në drejtësi, por si Qeveri, gjithçka që është në kompetenca tona, ne do ta kryejmë punën tonë”, ka thënë kryeministri Haradinaj.

“Për mua është e papranueshme secili rast që zgjatet pa kufi. Një drejtësi e vonuar është drejtësi e mohuar. Është mirë të arrihet te epilogu. Edhe këtu ju siguroj që sa i përket Qeverisë, do të vijë në shprehje dhe do të përmbyllet, çka është pjesë e jona. Vetëm pjesën e prokurorit e gjyqtarit nuk mund ta bëjmë”, shtoi Haradinaj.

Haradinaj u shpreh i përkushtuar se do t’i përgjigjet çdo kërkese të deputetëve dhe se vetëm dje ka bërë përjashtim, kur ai la vazhdimin e seancës së jashtëzakonshme për shkak se, siç u shpreh ai, temat që po diskutoheshin nga opozita ishin të parëndësishme dhe se kishte punë për të bërë në krye të ekzekutivit. /Express/