AKR rrezikon të humbë edhe një ministri nga marrëveshja me PAN’in

Koalicioni PAN dhe AKR arritën një marrëveshje për bashkëqeverisje ku partia e Behgjet Pacollit mori drejtimin e 5 ministrive të Qeverisë. Pas negociatave të djeshme, AKR u pajtua që të heqë dorë nga njëra prej këtyre 5 ministrive, të cilën e kërkuan drejtuesit e Listës Srpska.

Por, sipas burimeve të Gazetës Fjala, AKR mund ta humbë edhe një ministri, pasi atë mund ta marrë në drejtim ish-ministri Dardan Gashi, që ishte pjesë e negociatave në mes të familjes Rugova dhe të nominuarit për Kryeministër, Ramush Haradinajt, për votën e deputetes Teuta Rugova në favor të PAN’it.

Tutje, mësohet se kjo ka qenë arsyeja që Teuta Rugova nuk është paraqitur në seancën e sotme të thirrur për në orën 11:00.

Dardan Gashi edhe në qeverinë e kërkuar ka qenë ministër i Mjedisit, ku kryeministër në atë kohë ishte Hashim Thaçi. Së fundmi, Gashi kishte marrë pjesë aktivisht në takimet në shtëpinë e familjes Rugova dhe ishte shprehur i gatshëm ta drejtojë ndonjë ministri në kabinetin e Qeverisë Haradinaj.

Me marrëveshjen që është bërë mes PAN dhe AKR, kësaj të fundit i takojnë 5 ministri dhe 7 zëvendësministra dhe zëvendëskryeministri i parë.