Hajredin Hyseni uron besimtarët myslimanë për Kurban Bajram

Kandidati për kryetar të Podujevës nga Partia Demokratike e Kosovës Hajredin Hyseni ka uruar të gjithë besimtarët e besimit Islam me rastin e festës së Kurban Bajramit, transmeton PodujevaPRESS.com

Ky është urimi i tij:

Të nderuar qytetarë, bashkëvendës dhe besimtarë mysliman,

Jemi në prag të Kurban Bajramit, festës së madhe të besimit islam, të cilën myslimanët e mbarë botës e festojnë duke manifestuar përkushtimin, besimin, dashurinë dhe sakrificën për Krijuesin.

Në këtë ditë të shënuar do të kujtojmë rrugën tonë dhe të parëve tanë, drejt lirisë dhe përparimit të shoqërisë sonë. Do të kujtojmë sakrificën e gjeneratave në histori. Me këtë kujtim do ta rrisim respektin, përuljen dhe kujtimin për veprën e tyre që pasqyrohet me lirinë e vendit tonë dhe të ardhmen e brezave që vijnë.

Të nderuar besimtarë,

Le të kujtojmë në këtë ditë të sakrificës edhe solidaritetin tonë me të gjithë njerëzit që kërkojnë paqen, lirinë, drejtësinë dhe ekzistencën. Le të mos harrojmë njerëzit tanë në nevojë dhe të shtrijmë dorën e mëshirës dhe solidaritetit. Kjo do ta bëjë shoqërinë tonë më të shëndetshme dhe më të qëndrueshme në rrugën e progresit.

Uroj që besimi dhe lutjet tuaja drejtuar Krijuesit, dashuria dhe solidaritetit për njerëzit, të shpërblehet me mirësi dhe paqe!