Vdes mamia llapjane Sanije Topanica, iu ndihmoi grave në lindje gjatë luftës
Të gjitha goditjet që ia bënë sot Mustafa e Abrashi Shpend Ahmetit për Prishtinën
Kreu i LDK’së, Isa Mustafa, derisa ka prezantuar kandidatin e partisë së tij për Kryetar të Prishtinës, Arban Abrashin, ka thënë se ai do të ketë një fillim të vështirë në drejtim të Komunës së kryeqytetit, pasi do të ballafaqohet me mos punën e Shpend Ahmetit për katër vite të qeverisjes së Prishtinës.
Sipas ish-kryetarit të Prishtinës, Ahmeti i VV’së, vetëm ka bërë zhurmë për projektet që ishin kontraktuar në kohen kur LDK’ja kishte drejtuar komunën, deri në fund të vitit 2013.
“Nuk është punuar gjatë këtyre katër viteve, është bërë shume zhurmë por nuk ka punë dhe projekte esenciale për Prishtinën. Është punuar vetëm në projekte që unë i pata kontraktuar më parë, siç kanë qenë ai i termokosit, ose i ujësjellësit”, tha Mustafa, në konferencën e prezantimit të ish-ministrit të Punës, Arban Abrashit për Kryetar të Prishtinës.
“Nuk është ndërtuar asnjë shkollë, është ndërtuar shumë pak nga infrastruktura”, tha ai, shkruan Gazeta Express.
E nga ana tjetër, deputeti i LAA’së, Arban Abrashi tha se vet kandidimi i tij në Prishtinë garanton fitore dhe kthimin e kësaj komune nën qeverisjen e LDK’së.
Abrashi tha se do t’ua ktheje Prishtinën qytetarëve dhe do të merret me problemet e tyre.
“Qytetari i Prishtinës ka problem me ngrohje, me ndriçim, me ndotje akustike, me ndotje mjedisore, me parkingje, me transport. E unë si kryetar i ardhshëm do të merrem me këto. Nuk do të merrem me çështje regjionale, me çështje ndërkombëtare, nuk do të merrem me çështje të qeverisë”, tha Abrashi, i cili më vonë tregoi se ka zgjedhur ta shpallë zyrtarisht kandidaturën në parkun që ndodhet krejt pranë objektit të Komunës së Prishtinës, por që është lënë i shkatërruar.
“Konceptimi im politik dhe praktik për Prishtinën ka të bëjë që qytetari të jetë në fokusin tonë. Që të ndajmë hallet me ta, brengat me ta, dhe të gjejmë zgjidhje të përbashkët që tu ofrojmë qytetarit të Prishtinës”, tha kandidati i LDK’së për Kryetar të Prishtinës, Arban Abrashi. /GazetaExpress/.
