“Super-aksioni që do godasë paratë e krimit merr jetë me largimin e pushuesve”

Jaupi pati një porosi mjaft të rëndësishme, e cila do të nisë të zbatohet me rënien e fluksit të pushuesve. Dhe ka të bëjë pikërisht me një prioritet të deklaruar edhe nga kryeministri Edi Rama: Goditjen e grupeve kriminale me pasuri të pajustifikuara.

“Së fundi por jo për nga rëndësia, goditja e grupeve kriminale, e elementëve me precedentë kriminalë, e atyre që qarkullojnë me makina të blinduara apo me armë zjarri pa leje. Nga ana juaj të evidentohen të gjithë këta persona, pasuritë e tyre të cilat nuk i justifikojnë, pasi ne po hartojmë një plan masash, dhe me rënien e fluksit të pushuesve, menjëherë do të fillojmë punën për goditjen e kësaj veprimtarie kriminale”,u shpreh zv/drejtori i Policisë së Shtetit gjatë takimit të zhvilluar me stafin drejtues të Drejtorisë Vendore të Policisë Vlorë, asaj Kufitare dhe Delta Forcës.

Porosi të tjera për policinë nga ana e tij, ishin: Monitorimi në terren për goditjen e kultivimit të kanabisit, kontrolle në të gjitha plazhet për të parë nëse pushtetet vendore kanë krijuar kushtet e sigurisë nga mjetet lundruese për pushuesit, ndëshkim të shkelësve që drejtojnë automjetet pa respektuar rregullat dhe vlerësimi serioz i çdo telefonate që mbërrin në sallën operative, sado problemiI vogël që mund të duket fillimisht.

“Muaji Gusht është muaj angazhimi dhe përkushtimi për Policinë e Shtetit. Nga nesër e gjithë Policia do të kalojë në shërbim 12 orësh, me qëllim përmbushjen e disa prioriteteve primare për Policinë e Shtetit.

Së pari, vijimi më me përkushim i luftës kundër kultivimit dhe trafikimit të kanabisit. Menjëherë të  fillojë përsëri rikontrolli i imtësishëm i gjithë territorit, i magazinave, ish magazinave e depove, e tuneleve, ish reparteve e banesave të braktisura, më qëllim të dyfishë, edhe për të parandaluar dhe goditur kultivimin e bimëve narkotike , por edhe për të evidentuar e goditur magazinimin e lëndës narkotike që mund të jetë të prodhuar vitin e kaluar.

Së dyti, intensifikoni masat për të rritur parametrat e sigurisë së pushuesve dhe të qytetarëve në përgjithësi. Nën drejtimin e Prefektit, vijoni kontrollet në të gjitha plazhet me qëllim që pushteti vendor të krijojë të gjitha kushtet e sigurisë nga mjetet lundruese për plazhistët. Asnjë hap prapa, asnjë tolerim përballë çdo presioni, për Policinë e Shtetit është primare siguria e jetës së qytetarëve dhe jo përfitimi i disave në kundërshtim me ligjin dhe duke u shndërruar në rrezik për jetën e të tjerëve.

Policia Rrugore, kryesisht në fundjavë, por  edhe gjatë javës, të intensifikojë masat për ndëshikimin e të gjithë atyre drejtuesëve të automjeteve që shkelin rregullat e qarkullimit rrugor, duke parakaluar në mënyrë të gabuar, duke drejtuar mjetin nën efektin e alkoolit apo më keq akoma  në gjendje të dehur, duke udhëtuar me shpejtësi tej normave të lejuara, duke rrezikuar jetën e tyre dhe të përdoruesve të tjerë të rrugës.

Së treti, vlerësoni maksimalisht çdo telefonatë që vjen në sallën operative, vlerësoni dhe trajtoni me profesionalizëm çdo konflikt, sado i vogël që të jetë, pasi edhe konflikti më banal mund të përshkallëzohet deri në humbje jete. Ndaj reagoni në kohë, me profesionalizëm dhe në zbatim të plotë të ligjit”, – u shpreh zv.drejtori i Policisë.

/Gazeta Express/