Shqetësuese në Podujevë mbetet numri i i madh i aksidenteve

Këshilli Komunal për Siguri në Bashkësi (KKSB) i Komunës së Podujevës, në mbledhjen e sotme të kryesuar nga kryetari i Komunës, Agim Veliu, ka shqyrtuar raportin e Policisë së Kosovës dhe KFOR-it për gjendjen e sigurisë në komunë dhe informatën për sigurinë në komunikacion.

Lidhur me gjendjen e sigurisë gjatë dy muajve të fundit, sipas raportit të Stacionit Policor, gjendja e sigurisë në Komunën e Podujevës është e qetë dhe stabile.

Sipas raportit, gjatë periudhës raportuese ka pasur rënie të aktiviteteve kriminale  krahasuar me të njëjtën periudhë të vitit të kaluar.

Gjatë kësaj periudhe policia është duke realizuar planin operacional në parandalimin e të shtënave gjatë ahengjeve të ndryshme familjare.

Edhe përfaqësuesi i KFOR-it, gjendjen e sigurisë në komunën e Podujevës e vlerësoi të qetë dhe stabile.

Ai tha se edhe situata përgjatë brezit kufitar është e mirë, kurse gëzon fakti se ka rënie të prerjes ilegale të pyjeve.

Lidhur me gjendjen e sigurisë në komunikacion në takim u tha se është shqetësues numri i madh i aksidenteve, përkundër shtimit të masave të kontrollit-patrullimit të policisë.

Pavarësisht faktit se Policia e Kosovës ka shtuar patrullimet në rrugën magjistrale dhe rrugët rajonale të Komunës së Podujevës, kryetari Veliu tha se  brengos numri i madh i aksidenteve në komunikacion, të cilat në shumë raste po përfundojnë edhe   +me fatalitet.

Kryetari Veliu kërkoi nga Policia e Kosovës, por edhe nga organet e tjera relevante, mobilizim dhe angazhim më të madh në parandalimin, por edhe vetëdijësimin e pjesëmarrësve në komunikacion.