Këto janë katër komunat e Kosovës që nuk kanë asnjë hotel në territorin e tyre

Siç bëhet e ditur nga raporti vjetor i Agjencisë së Statistikave të Kosovës (ASK), për vitin 2016, këto katër komuna janë të vetmet në Kosovë që nuk “posedojnë” asnjë hotel, megjithëse në këto komuna ka të regjistruara motele.

Shtimja, Ranillugu, Artana dhe Hani i Elezit janë katër Komunat e Kosovës që nuk kanë asnjë hotel brenda territoreve të tyre.

E njëra prej këtyre komunave pa hotele, Artana, është njëra prej vendeve më të vizituara në Kosovë. Kjo për shkak të atraksionit turistik, Kalasë së Artanës, e cila mbledh shumë turistë brenda vitit, raporton Insajderi.

Artana, si vend që tërheq vizitorë, ka vetëm dy motele të regjistruara në Komunë.

Ndërkaq, siç bëhet e ditur nga raporti i ASK-së, komuna që posedon më së shumti hotele të regjistruara është Prishtina, me 42 hotele.