Isa Mustafa ia rehaton vëllain Sokol Havollit në Bankën Evropiane si këshilltar të Qeverisë

Kur s’je për vëlla, për kë? Kjo i shkon mirë Sokol Havollit, shefit të Kabinetit të Kryeministrit Isa Mustafa. Sokol Havolli e ka shfrytëzuar mbledhjen e fundit pothuajse të kësaj Qeverie për ta graduar-rehatuar vëllain e tij në një pozitë të rëndësishme shtetërore.

Vëllai i Sokol Havollit, Berati që ka punuar në Ministrinë e Financave që drejtohet nga Avdullah Hoti, është emëruar në mbledhjen e fundit të Qeverisë këshilltar i Kosovës në Bankën Evropiane për Rindërtim dhe Zhvillim.

Në vendimin e Qeverisë nuk tregohet emri i këshilltarit, por Indeksonline merr vesh se bëhet fjalë për Berat Havollin, vëllain e Sokol Havollit.

“Miratimin e kabinetit qeveritar e mori edhe vendimi për emërimin e Këshilltarit të Konstituencës të Qeverisë së Republikës së Kosovës në Bankën Evropiane për Rindërtim dhe Zhvillim. Kosova nga viti 2012 është anëtare me të drejta të plota në Bankën Evropiane për Rindërtim dhe Zhvillim. Ky anëtarësim i ka ndihmuar Kosovës që të përfitoi një numër të konsiderueshëm të projekteve nga BERZH-i dhe deri më tash janë 51 projekte që Kosova ka përfituar nga ky institucion financiar ndërkombëtar në vlerë prej 228 milionë euro, prej të cilave aktualisht janë duke u zbatuar projekte në vlerë prej 138 milionë euro, pjesa dërrmuese në sektorin publik, në financimet e projekteve infrastrukturore, por ka edhe në sektorin privat në bazë të marrëveshjeve që BERZH ka me kompani dhe me banka vendore”, thuhet në vendimin e Qeverisë.

Ndërkohë Indeksonline ka provuar të kontaktoj me Havollin, për të kuptuar mbi këtë vendim, mirëpo kontakti ka qenë i pamundur.

Lidhja e Havollëve me Mustafën

Isa Mustafa ka qenë njëri ndër themeluesit e Institutit Riinvest. Ndërsa babai i Sokol e Berat Havollit, Ymer Havolli që mban pozitën e shefit të bordit të Trustit, i ka 10 për qind të aksioneve në Riinvest.

Ymer Havolli i ka deklaruar edhe në formularin e Kundër Korrupsionit që i posedon aksione. (Shih formularin anti korrupsionit Ymer Havolli)

http://www.akk-ks.org/declarat…

Kujtojmë se Ymer Havolli është në mandatin e dytë si shef i bordit të Trustit, e në këtë pozitë ka ardhur me ndihmën e LDK-së. /Indeksonline/

Derisa këtu mund ta gjeni edhe vendimin e marrë nga Qeveria e Kosovës në mbledhjen e fundit ku përmendet edhe vëllai i Havollit, Berati. http://www.kryeministri-ks.net…