Testohet autostrada e parë elektrike në botë (VIDEO)

E ashtu-quajtura “autostrada e parë elektrike” po testohet në Suedi me synimin për të ulur ndotjet nga efekti serë, në sektorin e transportit. Projekti u nxit nga autoriteti suedez i transportit dhe është rezultat i bashkëpunimit teknologjik mes kompanisë “Siemens” dhe prodhuesit të kamionëve, “Scania”.

Ideja është e thjeshtë, kamionët bëjnë kontakt tek kablli, gjë që të kujton tramvajin nëpër qytete. Pas kontaktit, motori me naftë stakohet dhe fillon të punojë me energji elektrike. Të ndërtuar enkas si kamionë hibridë, ata lidhen në rrjet përmes një pajisjeje në tavanin e kabinës, që mundëson futjen në punë të motorit elektrik.

Anna Johansson është Ministre e Transportit dhe Infrastrukturës në Suedi. “Është një ndjenjë e mirë. Të jesh mes të parëve në një industri që drejton një makineri të rëndë elektrike, padyshim është e mahnitshme. Kjo tregon mundësinë e ndryshimit të sektorit të transportit, që Suedia është novatore dhe kemi guximin për të udhëhequr kundër ndryshimeve klimatike dhe drejt një shoqërie të qëndrueshme.”

Gjatë dy viteve të ardhshme, ekspertët planifikojnë të bëjnë prova, të mbledhin të dhëna, të masin ndikimin si dhe të përcaktojnë nëse ky sistem mund të zgjerohet në mbarë vendin. Ndërsa kompania Siemens thotë se sistemi ka potencial për t’u shfrytëzuar në miniera, ku trajektoret e lëvizjes së makinerive janë të përcaktuara.