Haradinaj: Serbët nuk kanë pasur kërkesa që vështirësojnë marrëdhëniet

Kandidati për kryeministër nga koalicioni PAN që edhe doli fitues në zgjedhjet e 11 qershorit, Ramush Haradinaj, ka treguar se a kanë vënë serbët e Kosovës kushte në shkëmbim të votës së tyre.

“Ata janë të gatshëm që të marrin përgjegjësitë në qeverisje në mënyrë që të mund të kujdesen për ata që i kanë votuar, nuk kanë ardhur me kërkesa të caktuara politike që vështirësojnë marrëdhëniet tona”, ka thënë Haradinaj.

Ndërkaq, Haradinaj ka thënë tutje se oferta për takim për LDK’në ka qenë serioze dhe e sinqertë. Ai ka thënë se këtë do ta bënte edhe sikur t’i kishte numrat për ta formuar qeverinë, shkruan gazetametro.net.

“Unë kam bërë atë që është detyrë e imja, që të fillojë konsultat, edhe nëse do të kishim 65 deputetë të siguruar nga zgjedhjet, është mirë që para se të formohen institucionet të informohen se çfarë Qeverie do të formojmë”, ka thënë ai.

Haradinaj madje ka kritikuar Pacollin për vështirësi komunikimi me të. Ai ka thënë se krijimi i këtyre praktikave, siç thotë ai, i shkuarjes në qoshe të secilit, nuk e dërgon Kosovën përpara, shkruan gazetametro.net.

“Nëse krijojmë kësi praktikash, si ndodhin proceset në vend? Nëse të gjithë shkojmë në qoshet tona si do të ecë Kosova përpara? U pa nga përvojat e mëhershme”, shtoi Haradinaj.

Ndryshe, Haradinaj është mandatar i parë për krijimin e qeverisë, pasi ka arrituar që koalicioni që ai ka drejtuar të dalë i parë në zgjedhje. Por, i pari i AAK’së nuk po arrinë të gjej një matematikë të qartë që ia siguron numrat, ndonëse ai po thotë që i ka./gazetametro/