Lekaj: Kot flasin e shkruajnë, PAN do ta formojë qeverinë!

Nënkryetari i AAK-së, Pal Lekaj, në një prononcim për “Gazeta Blic”, është shprehur i bindur se Qeveria e Kosovës do të formohet nga koalicioni PAN.

Lekaj tha se njerëzit në mënyrë dëshpëruese po flasin e shkruajnë sikur po bëhet fjalë për një shtet tjetër e jo për Kosovën, duke iu referuar ‘kundërshtarëve’ në këtë rast VV-së e koalicionit LAA të cilët janë të bindur që koalicioni PAN nuk i ka votat për formimin e qeverisë.

“Ne e kemi thënë në vazhdimësi se nuk bëhet fjalë thjesht për numra, por qeveria Haradinaj do të votohet kualitativisht në seancën e parë kurdo që ajo do të mbahet për tu votuar Qeveria e Kosovës. Kështu që disa njerëz në mënyrë dëshpëruese flasin e shkruajnë sikur po bëhet fjalë për një shtet tjetër kujt e jo për Kosovën”, tha ai.

Sipas Lekajt, Kosova nuk ka kohë për të humbur dhe se ky koalicion do të punojë për të zënë kohën e humbur për ti shtyrë përpara proceset e vendit.

“Kosova nuk e ka luksin për tu vonuar në themelimin e institucioneve të reja të dala nga zgjedhjet e 11 qershorit dhe PAN me Ramushin kryeministër do të punojë që të zëmë kohën e humbur për t’i shtyrë përpara proceset pozitive që forcojnë vendin. Të tjerët nëse kanë kohë të merren me teori”, ka thënë Pal Lekaj për Gazeta Blic.

Lekaj më tej shprehet i bindur se që qeveria do të formohet në kohë optimale, si dhe do të respektohen afatet ligjore.

“Qeveria dhe të gjitha institucionet do të formohen në kohën me optimale të mundshme, atëherë kur presidenti ta bëjë të ditur pas takimit me spektrin politik parlamentar se do të thirret seanca konstituive. Do të respektohen të gjitha afatet ligjore në këtë drejtim”, tha ai.

Në anën tjetër koalicioni PDK-AAK-Nisma me 39 deputetë nuk mund ta bëjë qeverinë, qoftë edhe me votat e të gjithë deputetëve të pakicave. Në këtë mënyrë, derisa nuk ka ndonjë bisedë zyrtare me partitë e tjera, bisedat me deputetë individualisht vazhdojnë.

Ndryshe Pas certifikimit të rezultateve të zgjedhjeve nga KQZ-ja, është hapur rruga për formimin e institucioneve, konstituimit të Kuvendit dhe formimin e Qeverisë.

Kuvendi duhet të konstituohet deri me 8 gusht, pra një muaj nga dita e djeshme(8 korrik), kur u bë certifikimi i rezultateve të zgjedhjeve./GazetaBlic.com/