AAK tregon se me kënd po bisedon Haradinaj për krijimin e qeverisë së re

Aleanca për Ardhmërinë e Kosovës është e bindur se PAN-i i ka siguruar votat për krijimin e qeverisë së re. Kësisoj, zyrtarët e kësaj partie kanë treguar se i kandidati për kryeministër, Ramush Haradinaj, është në bisedime me subjektet politike dhe disa deputet.

Anëtari i kryesisë së AAK-së, Muharrem Nitaj ka thënë për “Indeksonline” se PAN-i është në fazë e fundit të hulumtimeve për mundësitë që të sigurohen numrat për një qeveri stabile.

“Ka pas një proces zgjedhor i cili ka përfundu dhe besojmë se certifikimi i rezultateve përfundimtare pritet të bëhen brenda javës. Sipas rezultateve koalicion PAN është fituesja me të nominuarin Ramush Haradinaj për kryeministër. Personalisht Haradinaj ka nisur bisedimet edhe me parti politike si dhe deputet”, është shprehur ai.

Sipas Nitajt, marrëveshja përfundimtare pritet me të finalizohet pas certifikimit përfundimtar të zgjedhjeve.

Ndryshe, Komisioni Qendror Zgjedhor ka sqaruar se është në pritje të vendimit të Gjykatës Supreme që të vazhdojë me procesin e certifikimit të votave për zgjedhjet e jashtëzakonshme parlamentare të 11 qershorit.

Valdete Daka, kryetare e KZQ-së i ka thënë “Indeksonline” se posa të jepet vendimi i Supremes dhe të merret konfirmimi që nuk ka më ankesa, atëherë do të kryhet certifikimi. E krejt kjo pritet të bëhet brenda kësaj jave. /Indeksonline