Apel i institucioneve: Të shtunën të shmangen lëvizjet nga ora 10:00 -17:00

Të shtunën sipas parashikimeve në Prishtinë pritet të ketë temperatura të larta. Për këtë komuna e Prishtinës u ka bërë apel qytetarëve që të shmangin lëvizjet nga ora 10:00 deri në orën 17:00.

Po ashtu komuna ka njoftuar se do të vendos edhe dy cisterna me ujë të pijshëm dhe për freskim.

“Apelojmë te qytetarët që të shmangin ekspozimet e panevojshme në diell nga ora 10:00 deri në orën 17:00. Kjo vlen sidomos për kategoritë e cenueshme si të moshuarit, shtatëzënat dhe të sëmurit me sëmundje kronike e sidomos me ato kardiovaskulare. Apelojmë gjithashtu që gjatë ditës së nesërme të konsumojnë sasi të mjaftueshme të ujit dhe të qëndrojnë në ambiente të freskëta”.

“Për qytetarët në qytetin e Prishtinës, Komuna e Prishtinës në bashkëpunim me shërbimin e zjarrëfiksave, do të vendos dy cisterna me ujë të pijshëm dhe për mundësi freskimi në Sheshin “Ibrahim Rugova” dhe në Sheshin “Zahir Pajaziti”. Gjithashtu ekipet në Qendrat e Mjekësisë Familjare dhe në Qendrën e Mjekësisë Urgjente do të jenë në gatishmëri të plotë dhe luten të gjithë qytetarët që ndjejnë shqetësime të lajmërohen në këto qendra”, thuhet në komunikatën e komunës, përcjell lajmi.net.

Po ashtu, u bëhet thirrje  qytetarëve dhe bizneseve që gjatë këtyre ditëve, uji i pijshëm të konsumohet në mënyrë sa më racionale./Lajmi.net/