UP’së i suspendohen 23 programe (Foto)

Universitetit të Prishtinës ‘Hasan Prishtina’, i janë suspenduar 23 programe të të gjitha niveleve të studimit.

Fakultetet më të prekura të UP’së nga ky vendim i KSHC’së janë Fakulteti Ekonomik, Fakulteti i Edukimit dhe ai i Inxhinierisë Mekanike, me nga katër programe të suspenduara, shkruan Gazeta Metro.

Degët e Fakultetit Ekonomik që nuk do të kenë të drejtë të regjistrojnë studentë të rinj deri në një vendim të ri të Këshillit janë ‘Ekonomi e Aplikuar dhe Menaxhment’, niveli Bachelor, ‘Ndërmarrësi dhe Zhvillim Ekonomik Lokal’, niveli Master, si dhe dy programet e Doktoraturës – Ekonomiks në gjuhën shqipe dhe angleze.

Ndërkaq, në Fakultetin e Edukimit janë suspenduar katër programe të nivelit Master. ‘Mësimdhënie’ në Matematikë, Shkenca Natyrore, Shkenca Sociale dhe Teknologji dhe TIK nuk do të kenë të drejtë të pranojnë studentë të rinj.

Sa i përket Fakultetit të Inxhinierisë Mekanike, suspendimi vlen për dy nivelet e programit ‘Kontruksione dhe Mekanizim’, Bachelor dhe Master. E njëjta gjë vlen për nivelet Bachelor e Master të programit ‘Termoenergjetikë dhe Termoteknikë’.

Pezullimi i akreditimit të këtyre programeve të studimit nënkupton që këto institucione nuk do të kenë të drejtë të regjistrojnë studentë të rinj për vitin e ardhshëm akademik 2017/18 deri në një vendim tjetër të KSHC-së së AKA-së.

Mirëpo, studentët e regjistruar në këto programe të studimit në vitet e mëhershme akademike, tanimë të pezulluara, do të vazhdojnë me studimet e tyre në përputhje me statutin e institucionit, si dhe me dispozitat ligjore në fuqi. /gazetametro/