Kjo është data kur pritet të mbahen zgjedhjet lokale në Podujevë

Në takimin e thirrur nga presidenti i Kosovës, Hashim Thaçi, përfaqësues të partive politike kanë dhënë opinionet e tyre për datën e mbajtjes së zgjedhjeve lokale.

E, opinionet e partive ishin në shumicë dërrmuese për datën 22 tetor, shkruan gazetametro.

I pari që foli ishte Uran Ismaili nga PDK, por që nuk dha ndonjë datë të saktë si propozim, por vetëm kërkoi që ato të mbahen brenda afatit ligjor. 22 tetorin si datë të mundshme për zgjedhje, e dha i pari Ismajl Kurteshi nga VV, duke thënë se është data ideale.

Këtë propozim, që është afati më i hershëm ligjor për mbajtjen e zgjedhjeve lokale, e përkrahën shumica e partive. LDK, AAK e AKR si parti të mëdha dhanë mbështetjen për 22 tetorin. Gjithashtu, edhe partitë e tjera dhanë mbështetjen për këtë datë, por ishte Avni Klinaku që përmendi edhe 15 tetorin si datë të mundshme, e Valdete Bajrami përmendi 29 tetorin.

Ndërkaq, edhe partitë e minoriteteve kanë dhënë opinionet e tyre që përkrahin mbajtjen e zgjedhjeve më 22 tetor, duke dhënë arsyet e tyre për këtë propozim, shkruan gazetametro.

Arsyetimet për këtë datë, ishin të natyrës së ndryshme. Që nga ajo se duhet të mbahen sa më herët duke pasur parasysh që procesi mund të zgjatet me balotash, e deri te mbajtja sa më larg dimrit për shkak të motit.

Partitë përveç që propozuan datën e zgjedhjeve, ato përshëndeten procesin e zgjedhjeve të përgjithshme. Madje, kishte propozim që zgjedhjet e ardhshme lokale të mbaheshin me mbikëqyrje të kamerave. Ishte Zef Morina nga Partia Shqiptare Demokristiane e Kosovës që propozoi që procesi të vëzhgohet me kamera në mënyrë që, siç tha ai, të garantohet një proces më i mirë.

Ndërkohë, edhe Valdete Daka nga KQZ ka shprehur gatishmërinë për organizim të zgjedhjeve.

“KQZ, natyrisht që kurdo që ato shpallen do t’i organizojnë, por duhet ta kenë paraysh që po shkojmë drejtë dimrit dhe zgjedhjet sado më herët të bëhen do të ishte më e përshtatshme. Ne jemi të gatshëm t’i organizojmë, ashtu siç i kemi organizuar”, ka thënë Daka.

Në fund, presidenti Thaçi duke falenderuar për opinionet e partive, i ka siguruar ato që me përgjegjësinë që i jep kushtetuta, ai do t’i ketë parasysh këto propozime dhe mbi to do të shpall datën e zgjedhjeve, e që sipas propozimeve, do të jetë 22 tetori./gazetametro/