Agim Veliu uron qytetarët e Podujevës për Ditën e Çlirimit

Në një njoftim për medie Kryetari i Komunës së Podujevës Agim Veliu ka uruar qytetarët me rastin e 18 vjetorit të çlirimit, transmeton PodujevaPRESS.com

Ky është urimi i plotë:

Të dashur qytetarë,

Podujeva jonë sot feston ditën më të rëndësishme në historinë e saj të lavdishme, Ditën e Çlirimit.

Në këtë datë, më 19 qershor të vitit 1999, qytetarët tanë iu gëzuan ndjenjës më të bukur, ndjenjës së lirisë.

Kjo ditë shënon një nga ngjarjet më kulmore të historisë sonë, çlirimin nga regjimi serb.

Është dita e kurorëzimit të aspiratave shekullore për liri.

Në këtë përvjetor çlirimi, si në çdo vit tjetër, kujtojmë me nderime, deri në përulje sakrificën e bijave dhe bijve më të mirë të kombit të cilët nuk kursyen asgjë nga vetja e tyre në rrugën drejt lirisë.

Përjetësisht u jemi mirënjohës edhe aleatëve tanë, NATO-s, SHBA-ve dhe vendeve mike të BE-së të cilët mbështetën përpjekjet tona të drejta për ta çliruar vendin tone.

Të nderuar qytetarë të Llapit,

Me bindjen e fuqishme se vendi ynë çdo ditë e më shumë po avancon drejt fuqizimit, zhvillimit dhe mirëqenies së përgjithshme,

Urime Dita e Çlirimit, gëzofshi gjithmonë të lumtur dhe të lirë!