Haradinaj: Nuk ka krizë politike, Qeverinë do ta kemi shpejt

Kandidati për kryeministër nga koalicioni PAN, Ramush Haradinaj i ka akuzuar disa parti politike se po mundojnë të krijojnë krizë imagjinare politike në Kosovë.

Lideri i AAK-së ka thënë se normat zgjedhore kanë prodhuar rezultat i cili do të hap rrugë për krjimin e institucioneve.

“Defetistët janë ngutur edhe këtë herë për të lansuar lloj lloj tezash për një farë krize imagjinare politike. Ato që i bluajnë në kokat e tyre, po mundohen t’ua mveshin të tjerëve, me shpresë se kështu mund ta ofrojnë veten si shpëtimtarë. Por ky është një mashtrim utopik ordiner!”, ka shkruar në facebook Haradinaj.

“Standardet dhe normat zgjedhore, që i kemi në këtë Shtet, kanë prodhuar një rezultat që na hapë rrugën e krijimit të institucioneve të reja dhe kjo gjë do të ndodhë. Përgjegjësia politike këtë herë është më e madhe se sa mashtrimi utopik, dhe shumë prej të zgjedhurve e kanë kuptuar se nuk ka më kohë për eksperimente për njëfarë Kosove “futuriste”! Ne do t’i mveshemi punës dhe do ta kthejmë mbar këtë vend, sepse problemet janë të mëdha dhe janë konkrete”, ka thënë lideri i AAK-së.

Ai ka bërë të ditur se askush nuk mund ta rrezikojë Kosovën, duke shtuar se shteti shpejt do ta ketë Qeverinë.

“Nuk mund ta shkatërrojmë vendin e t’ia nisim nga e para, për tekat e askujt. Është derdhur gjak e djersë për ta krijuar këtë Kosovë, kështu siç e kemi, dhe askush nuk do ta ketë mundësinë e as fuqinë që ta rrezikojë ecjen përpara të vendit. Kosova do të bëhët dhe do ta ketë Qeverinë e saj, shpejt!”, përfundon postimi i Haradinajt në facebook. /Lajmi.net/