Reagim i Vetëvendosjes rreth Sheshit të Dëshmorëve në Podujevë

Në seancën e jashtëzakonshme të mbajtur sot me një pikë të rendit të ditës (Ri-alokimi i buxhetit të komunës për vitin 2017), Lëvizja Vetëvendosje është shprehur kundër duke e quajtur akt të keqmenagjimit dhe mashtrimit në kohë zgjedhje, njofton PodujevaPRESS.com

Kjo është komunikata e plotë:

Sot në Seancën e Kuvendit Komunal të Podujevës u mbajt mbledhja e jashtëzakonshme, ku si pikë e rendit të ditës ishte ri-alokimi i buxhetit të Komunës për vitin 2017. Grupi i asambleistëve të Lëvizjes VETËVENDOSJE!, konsideron se ngutija e mbajtjes së seancës është bërë për shkak të zgjedhjeve, për të bërë premtimet dhe mashtrimet e radhës. Ri-alokimi i buxhetit eshte pasojë e keqmenaxhimit, që ka pasoja të drejtëpërdrejta për jeten e qytetarëve të Llapit.

Lëvizja VETËVENDOSJE! konsideron që mjetet e dedikuara për bulevardin dhe sheshin e dëshmorve, duhet të përdoren vetëm për çfarë janë destinuar fillimisht. Ridestinimi i këtyre mjeteve në kode të ndryshme e sidomos në asfaltimin e rrugëve të ndryshme, është dëshmuar nga e kaluara që është vetëm një ndër keqpërdorimet e shumta që pushteti komunal ia bën parasë publike, me qëllim të përfitimit partiak.

Grupi i asambleistëve të Lëvizjes, në këtë mbledhje ngriti si çështje edhe dëmet që u janë shkaktuar fermerëve nga faktorët klimatik në dy vitet e fundit. Fermerët e Komunës tonë janë anashkaluar nga Komuna, e cila në situata si kjo do duhej t’u ofronte ndihmën e nevojshme për t’u rikuperuar nga humbjet. Ne propozuam që të ngritet një fond i veçantë për rastet emërgjente.

Asambleistët e Lëvizjes nuk e votuan këtë ri-alokim, të cilin e konsiderojmë të padrejtë. Ky veprim i pushtetit nuk ka për qëllim të mirën publike, por të mirën e LDK-së.