Bulliqi tregon kush e la jashtë listës dhe cilat parti i bënë ofertë

Shpejtim Bulliqaj, ish-deputet nga radhët e LDK’së ka reaguar vetëm pak orë pasi është publikuar lista zyrtare e kandidatëve për deputetë nga koalicioni LDK-AKR-Alternativa. Sipas tij, mungesa e emrit të tij në këtë listë është e qëllimshme dhe për këtë janë përkujdesur zyrtarë të LDK’së.

Bulliqaj, i njohur në publik si kundërshtues i madh i Demarkacionit, ka bërë të ditur se këto kundërshtime janë edhe arsyeja pse ai dhe një pjesë e respektuar e LDK’së kanë mbetur jashtë kësaj liste.

“Unë sot po e shoh listën e LDK-së dhe partnerëve të koalicionit. Unë e kam njoftuar opinionin publik se nuk do të jem në listën e LDK-së për faktin se kryetari i degës së LDK-së të cilës i përkas në bashkëveprim me kryesinë e LDK-së u përkujdesen të me largojnë nga lista”, ka shkruar Bulliqaj në rrjetin social Facebook, përcjell gazetametro.net

Ai ka treguar se ka pasur oferta nga partitë opozitare, mirëpo ai i ka refuzuar, kjo sepse siç ai u shpreh, kundërshtimet i ka bërë për shkak të bindjeve të tij, e jo për ta fituar një mandat prej deputeti.

“Motivi i këtyre largimeve është i ulët, ata që na larguan mua dhe kolegët kryesisht e bën si duket nga frika dhe respekti që ne gëzonim përditë e me tepër te elektorati i LDK-se e i cili respekt u forcua për shkak të qëndrimeve tona rreth disa çështjeve që ishin aktuale gjatë mandatit që lamë pas”, ka thënë ai ndër tjerash.

Kurse, sa i përket listës së LDK’së, ai ka bërë thirrje që të votohen vetëm ata që e meritojnë, e jo njerëzit servile, duke mos shpjeguar më shumë se për kënd e ka fjalën.

“Largimi është bëre selektiv, pasi që nuk ishim pak kolegë që i kundërshtuam disa çështje jetike për vendin dhe integritetin e tij. Me vie shumë keq për të gjithë anëtarësinë e LDK-së që janë zhgënjyer më këtë politikë fyese e linquese ndaj atyre që përkrahën vendimet e tyre lidhur me mos votimin e Thaçit për president vendi dhe cenimin e integritetit të shtetit tonë-demarkacionin”, ka shkruar Bulliqaj. /gazetametro/