Ku u inspiruan VV-ja dhe LDK-ja për moton #me zemër (Foto)

Lëvizja Vetëvendosje e paraqiti si moto të fushatës së zgjedhjeve të 11 qershorit zemrën. Ata, ‘me zemër’, u kërkojnë votën qytetarëve kosovarë.

Për këtë, ata u kritikuan nga partia tjetër kosovare, LDK’ja, për siç thonë ata, vjedhje të motos së fushatës.

LDK’ja duke publikuar një fotografi, pretendon se kështu do të dukej motoja e tyre, po që se VV’ja s’do t’u ‘vidhte’, siç thonë ata.

Por, duket se të dy partitë nuk kanë qenë aq kreative, pasi logoja me zemër nuk del të jetë autentike e asnjërës nga ta, shkruan gazetametro.net.

Nga fotografitë që ka siguruar Metro, kuptohet se motoja ‘me zemër’ për zgjedhje, është përdorur në mbarë rajonin. Ka qenë Serbia, Bosnja e Mali i Zi që kanë përdorur të njëjtën ide.

Siç mund të shihni në fotografi, këtu është një prej kandidaturave për deputete në Mal të Zi. Fotografia është e realizuar në Hreceg Noci të Malit të Zi.

‘Voto me zemër’, shkruan në billbordin që po shihni.

Po ashtu, një kampanjë tjetër politike për zgjedhje, është kjo e fotografuar në Novi Grad, në Republikën Serbë në Bosnjë. Aty thuhet: dëgjoje zemrën.

Bile, idetë e lidhura ‘me zemër’, burojnë që më herët. Ato ishin përdorur nga një kompani komerciale për të bërë thirrje në blerje të produkteve vendore, gjë që ndodh edhe në Kosovë, e që dihet saktësisht nga buron.

Ndërkohë që partitë shqiptare garojnë se cila ia vodhi njëra-tjerës ‘zemrat’ e fushatës, del se gjithë ato idetë i kanë të vjedhura në vendet e ish-jugosllavisë.