Peci dorëzohet para presionit publik: Anulon grantet për këshilltarin e tij dhe
LDK e lë në terr informativ Adem Salihajn
Ish-deputeti i LDK’së, Adem Salihaj, është ankuar publikisht se nuk di asnjë informacion lidhur me listën e deputetëve të Partisë së tij. Ka parashikuar se do të jetë aty pavarësisht disa informacioneve se LDK s’e ka në listën e kandidatëve për Parlamentin e ardhshëm.
“Nuk kam asnjë informatë zyrtare të konfirmuar lidhur me listën e LDK-së për deputetë”, ka shkruar Salihaj, në Fb.
LDK s’e ka publikuar listën e kandidatëve për deputetë derisa është konfirmuar se jashtë saj ka mbetur Shpejtim Bulliqi, i cili kishte kundërshtuar versionin e Qeverisë për shënimin e vijës kufitare me Malin e Zi.
Sidoqoftë, Adem Salihaj thotë se nuk beson se LDK bën diferencime.
“Po spekulohet shumë për diferencime, por nuk dua të besoj se partia ime e vlerave të mëdha demokratike do të bëjë diferencime të tilla, sepse ato, para së gjithash , do ta dëmtonin shumë vetë LDK-në në procesin zgjedhor që është para nesh”, ka shkruar Salihaj.
Ndërkohë që partia e Salihajt ende nuk e ka bërë publike listën me emrat e deputetëve që do të garojnë në zgjedhjet e ardhshme në Kosovë. Është raportuar se Avdullah Hoti është prijës i listës, Vjosa Osmani është në numrin 81 si dhe Arben Gashi në numrin 61.
Kosova po hyn në zgjedhjet e parakohshme parlamentare më 11 qershor pas rënies së Qeverisë nga një mocion mosbesimi në Kuvend dhe shpërbërjes së institucionit ligjvënës
Adem Salihaj para se të bëhej deputet ishte emëruar Drejtor i Stacionit të Autobusëve në Ferizaj pasi LDK kishte marrë pushtetin në këtë komunë.
Salihaj për një kohë ishte larguar nga LDK’ja duke u bërë Nënkryetar i LDD’së së Nexhat Dacit.
Në Qeverinë e koalicionit, LDK-AAK, e lidhur në kohën e Ibrahim Rugovës, Salihaj kishte mbajtur edhe pozitën e Zëvendëskryeministrit.
Zgjedhjet e reja të jashtëzakonshme mbahen më 11 qershor derisa partitë politike kanë dorëzuar listat e kandidatëve për deputetë të premten e kaluar. Kanë kohë deri të hënën të bëjnë korrigjime, ku pastaj KQZ do të certifikojë versionin përfundimtar të kandidatëve të partive për deputetë.
