Këta janë 9 deputetët që i kanë ‘dalë dorësh’ Isa Mustafës

Kur janë mbetur edhe pak kohë për të kapur mundësinë e fundit që të ratifikohet marrëveshja për Demarkacionin, Isa Mustafa, vazhdon të ketë problem me një numër të konsiderueshëm të deputetëve të partisë së tij.

Siç mëson gazetametro, janë 9 deputetë që janë kundër apo që do të abstenojnë nëse demarkacioni sillet për votim në Kuvend, shkruan gazetametro.net.

Sabri Hamiti dhe Anton Çuni mësohet se do të abstenonin për demarkacionin, ndërkaq janë edhe 7 deputetë që publikisht kanë refuzuar ta votojnë këtë marrëveshje.

Bëhet fjalë për Adem Salihajn, Shpejtim Bulliqin, Armend Zemajn, Besa Gaxherrin, Vjosa Osmanin, Fatmir Rexhepin dhe Arben Gashin.

Ndërkaq, Metro nga burime të saj mëson se numri i deputetëve që kundërshtojnë Mustafën e kalon 10’shin, mirëpo ende nuk dihet qartë se cilët janë ata, pasi LDK’ja ka zgjedhur të hesht këtyre ditëve.

Ndryshe, Mustafa bëri të ditur që këtë javë do ta procedojë demarkacionin për votim, por ai do të ballafaqohet të mërkurën me një mocion ndaj qeverisë së tij, të cilit po synon t’i shpëtojë duke shtyrë demarkacionin.

Ka qenë Ambasada e Amerikës sot që ka nxitur Qeverinë që ta procedojë demarkacionin, gjithashtu u bëri thirrje deputetëve që ta votojnë këtë marrëveshje pa vonesa./gazetametro