Shefja e grupit parlamentar të NISMA’s, Valdete Bajrami tha të hënën për Gazetën Express se ndonëse mund të duket e pabesueshme, opozita është koordinuar me disa deputetë të PDK-LDK’së që të votojnë pro shkarkimit të qeverisë Mustafa.

“Për të mërkurën, ashtu qysh e kemi nis që nuk na keni besu që i kemi nënshkrimet, edhe me ju thanë që i kemi votat s’besoni”, tha Bajrami.

“Na besojmë shumë që do ta rrëzojmë këtë qeveri. Në rast se këta s’marrin naj vendim paraprak, sot ose nesër”, ka shtuar ajo.

Shefja e grupit parlamentar të NISMA’s, pranoi se opozita VV-AAK-NISMA me 30 vota nuk e kanë të mundur shkarkimin e qeverisë me mocion.

“Neve na intereson t’i kemi 61 vota, ftesë u kemi bërë të gjithëve për votë. Në kontakt kemi qenë me të gjithë ata që kanë deklaruar se nuk pajtohen me qeverinë Mustafa, dhe presim që ata të jenë pro rrëzimit të kësaj qeverie përmes iniciativës tonë”, deklaroi Valdete Bajrami për Gazetën Express.

Tutje, ajo tha se NISMA si grup parlamentar nuk ka marrë ftesë për takim me ambasadorin e SHBA’ve Greg Delaëie, sic është raportuar.

“Jo deri në këto momente, jo”, është përgjigjur Bajrami për ftesën në fjalë.

Ndryshe prej shefes së deputetëve të NISMA’s Valdete Bajrami, ai i PDK’së Zenun Pajaziti të hënën i tha Gazetës Express se partia e parë ne vend që qeveris me LDK’në e Isa Mustafës, ende nuk ka marrë vendim për ta mbështetur apo jo mocionin e së mërkurës.

“Ne i kemi dhënë si parti, siç e dini, prioritet koordinimit brenda koalicionit, edhe mbetemi të gatshëm dhe me shpresë që me u koordinu gjithë procesi për gjitha përgjegjësitë që i kemi”, ka deklaruar nder tjera Zenun Pajaziti për Gazetën Express.