Llapi e Besa, një finale e madhe

Finalja ndërmjet Besës dhe Llapit zhvillohet më 3 qershor

Besa e Llapi janë dy skuadrat finaliste të Digitalb Kupës së Kosovës në futboll, pasi në gjysmëfinale eliminuan Trepçën, përkatësisht Drenicën. Sivjet trofeu i Kupës së Kosovës është luftuar shumë nga skuadrat kosovare, pasi ato e kishin parasysh se përmes këtij trofeu mund të dalin në Evropë. Gjithsesi, shumë afër këtij objektivi janë Besa e Llapi, por pikëpyetje e madhe mbetet, nëse do të arrijnë këto dy skuadra të prezantohen në garat e Ligës së Evropës apo jo, pasi licencimi në UEFA mbetet një sfidë e madhe për skuadrat kosovare. Përveç kriterit financiar, ku klubet tona janë bukur larg plotësimit të tij, një arsye më shumë për të besuar se rrezikojmë daljen në Evropë është edhe infrastruktura, ku Kosova nuk posedon asnjë stadium që plotëson kushtet për t’u zhvilluar ndeshjet ndërkombëtare. UEFA disa herë u ka bërë me dije institucioneve tona, që të investojnë në stadiumin evropian, ndryshe nuk do të luajnë në Evropën, madje së fundmi dhanë një afat prej pesë javëve për ta sjellë në gjendje të mirë stadiumin “Adem Jashari”, por duket se këto kërkesa po hasin në veshë të shurdhër, pasi ende nuk kemi lëvizje konkrete sa i përket fillimit të punimeve në mënyrë serioze.

Llapi “trondit” Drenicën

Sfida e parë gjysmëfinale ndërmjet Drenicës e Llapit e zhvilluar në Skenderaj, kishte sjellë një lojë shumë të fortë me një rivalitet të jashtëzakonshëm. Kjo edhe bëri që takimi kthyes i zhvilluar në stadiumin “Zahir Pajaziti” të pritet me kërshëri, pasi të dyja ekipet kishin paralajmëruar maksimumin për ta arritur fitoren. Askush nuk kishte besuar se kualifikimi i Llapit do të jetë kaq i lehtë përballë një Drenice, e cila di shpesh të befasojë, por ja që këtë herë gjithçka foli në të mirë të skuadrës llapjane, e cila dominoi plotësisht, duke fituar me rezultat 4:1. Nga dy gola për Llapin i shënuan Florim Bërbatovci, në minutën e 19-të dhe 60-të dhe Hamdi Namani, në minutat 48-të dhe 69-të. Derisa golin e nderit për Drenicën e shënoi Abazi, në minutën e tretë shtesë. “Nuk e prisnim këtë rezultat, por kam besuar në skuadër, në këta djem, në punën time dhe të stafit, si dhe kryesisë dhe ndihmës së tifozëve. Nuk do të ndalemi, Llapi është skuadër solide, dhe bashkërisht kemi besuar se do të dalim në Evropë, shpresoj t’ia dalim. Sa i përket Besës, ne do ta respektojmë, finalja është finale, me këta djem do t’ia arrijmë qëllimit, sepse edhe ashtu jemi afër licencimit”, ka thënë trajneri Llapit, Tahir Batatina.

Besa, sipas parashikimeve

Finalisti tjetër i Kupës së Kosovës është Besa, e cila, sipas parashikimeve, e eliminoi Trepçën, skuadër kjo e cila është duke menduar vetëm si ta sigurojë ekzistencën dhe nuk ishte e përqendruar tek Kupa. Kjo edhe bëri që përballja ndërmjet Besës e Trepçës, të diskutohet shumë madje edhe nuk munguan zërat për në mundësi fiksimi të rezultatit. Sido që te jetë, Besa është në finale aty ku edhe e meriton të jetë, pasi vërtet është skuadër për momentin shumë më e mirë sesa Trepça dhe këtë e dëshmon edhe rezultati bindës 6:0. Golat për Besën i shënuan Xhevdet Shabani në minutat 3 e 30-të, Donat Sheqerolli 7 e 64-t, Fatih Karahoda në minutën e 73-të dhe Kastriot Rexha në minutën e 77-të.

(Kosova Sot)