Ja çfarë tha sot Albin Kurti për Devollët!

Ish-lideri i Vetëvendosjes, Albin Kurti është shfaqur në Kuvendin e Kosovës me akuza të mëdha ndaj vëllezërve Shkëlqim e Blerim Devolli, të cilët sipas tij, janë pasuruar shpejt dhe përtej imagjinatës së tyre dhe njohurve tona. Madje, sipas tij, kanë kaluar edhe pasurinë e Bill Gates e Steve Jobs.

Në seancën e sotme të Kuvendit, Kurti tha se për pak vite këta u bënë pronarë të kompanive më të fuqishme në vend si fabrika e miellit M&Sillosi, Qumështorja VITA, Princ Caffe, Fabrika e sfunxherit “Comodita dopio”, fabrika e lëngjeve “Tango”, “Z-mobile”, Qendra e homologimit, Terminali doganor në Prishtinë, Pejë e Mitrovicë, Birra e Pejës, madje thuhet se edhe televizioni Klan Kosova është i tyre.

Por për ish kreun e VV-së, pasurimi i tyre ka ardhur si rezultat i kapjes së shtetit, pasi Devollët përfaqësojnë kapitalin e klanit Pronto.

“Të gjithëve na kujtohet pronto biseda e Adem Grabovcit me Shkëlqim Devollin, ku Grabovci i thotë Devollit “Kqyre se s’mujta me të thirrë… m’u ka zbraz krejt fyti…”, ndërkohë që Devolli i përgjigjet “U bo shef qe po t’i çoj…”. Shtrohet pyetja, a ju ka tharë fyti vetëm njëherë Grabovcit apo nuk i kanë publikuar pronto ankesat e tjera për tharje fyti? Cilido variant është më i keq se tjetri, dhe së dyti Devolli i thotë Grabovcit shef e jo anasjelltas. E shef do të thotë shef kuzhine apo shef fisi apo shef klani apo shef firme. Përderisa në këtë Qeveri e Kuvend kemi politikanë që përfaqësojnë kapitalin ekonomik si puna e Ramiz Kelmendit dhe Margarita Kadriut, te Devollët kemi situatën e përmbysur, ata janë biznesmenë që përfaqësojnë kapitalin e pronto politikanëve. Nuk kemi vetëm politikanë që përfaqësojnë interesat e bizneseve por ka edhe biznesmenë që përfaqësojnë interesa të politikanëve. Devoll ët janë arketipi i biznesit paravan të kapjes ekonomike të shtetit”, tha Kurti.

Kurti shkoi edhe me larg, duke thënë se si Devolli edhe Rukolli, Elkos e tajkunët e tjerë, përveçse nuk figurojnë si tatimpaguesit më të mëdhenj, i kanë kompanitë të cilat qendrën e tyre zyrtare edhe pse fiktive nuk e kanë në Kosovë.

“Për Devollin dihet se i ka kompanitë që kanë degë në Kosovë e janë të regjistruara në Maltë. Po ashtu Rukolli dhe të tjerët në Panama (ku ambasadore është mbesa e Kadri Veselit dhe ka pasur vizita të shpeshta zyrtare). Ky tip i operimit gjithnjë është i lidhur me gjoja “politikën e jashtme”. Po të vërehet me kujdes çdoherë ka vizita të çuditshme psh. në Maltë, në Luxemburg, në Panama apo dhe në vende jo fort të njohura si partner kryesorë ku Thaçi, Veseli jo më rrallë edhe këta të MZhE-së apo MPJ priten me nderime”, shtoi ai.

Derisa akuzoi Mustafën se nuk është vënë në shërbim të qytetarëve, por tajkunëve.

“Qeveria e sotme sikurse edhe çdo tjetër para saj është në shërbim të tajkunëve. Neve na nevojitet një qeverisje e re me shtet zhvillimor ku qeveria është e afërt me biznesin e vogël dhe të mesëm në përgjithësi, por jo tepër e afërt me tajkunët e monopoleve. Isa Mustafa s’e bën dot këtë, ai nuk po merret me ekonomi por me demarkacionin e Thaçit. Zaten e ka të vështirë të merret me ekonomi sepse magjistraturën dhe doktoratën i ka në kundërshtim me njëra-tjetrën: e para në frymën e socializmit vetëqeverisës të Kardelit, kurse e dyta për lidership e menaxhment brenda orientimit neoliberal. E të dyja këto janë të gabueshme”, theksoi Kurti.

Deputeti i LDK-së, Sadri Ferati ngriti problemin e vënies së zjarrit të objektit të qendrës shëndetësore në veri të Mitrovicës, në të vetmin vend ku qytetarët shqiptarë të asaj pjese marrin shërbime.

“Ata qytetarë të cilët jetojnë bukur të izoluar, atëherë kur kanë pritur që shteti i Kosovës të bëjë me shumë për punësimin e tyre, për investime në infrastrukturë për aq shumë që kanë nevojë, atje shihet se dikujt po i pengon ajo liri që kanë fituar ata dhe bashkëjetesë që po ndërtohet atje. Prandaj bëjë thirrje nga kjo foltore që të vazhdoj përcaktimi dhe përkushtimi dhe rezoluta që kemi nxjerr në Kuvend për ndikimin e kualitetit të jetës së qytetarëve atje dhe aq më parë një zë i ngritur që atje të mos lejohen të përsëritën situata të tilla. Atje është një mbijetesë që ndodh i shqiptarëve në atë pjesë, ndërsa një mbështetja me e madhe institucionale tregon se ata që duan ta prishin këtë bashkëjetesë nuk do të kenë sukses”, tha Ferati.

Shefja e grupit parlamentar të Nisma për Kosovën Valdete Bajrami kërkoi që të shkohet në zgjedhje, sepse ky koalicion është përbërja më e dëmshme që ndonjëherë e ka pasur vendi jonë.

Sipas deputetes Bajrami, dëme vendit nuk po i sjell vetëm kjo Qeveri, por edhe presidenti i vendit me iniciativat e tij.

“Ju kujtohet kur pati premtuar se do të padisë Dick Martin për Shpifje e që nuk ndodhi kurrë, por së fundmi është duke luajtur me të ardhme e shtetit sepse të luash me këto idetë të cilat ky njeri i deklaron publikisht e që në të vërtet ose nuk di ose i ka këshilltarët që nuk dijë se në vendin tonë ka pasur spastrim etnik. Të deklarohet “Presidenti” i vendit se në Kosovë nuk ka pasur Spastrim Etnik por ka pasur Përpjekje për spastrim etnik kjo përfundimisht nuk duhet lejuar sepse me këto deklarata tuaja të pa menduara mirë, të pa analizuara mirë do t’i kushtojnë Kosovës dhe të ardhmes tonë. Sepse e gjithë bota e dijë se kush ka kryer gjenocid dhe spastrim etnik në Kosovë, dhe nëse ju nuk e keni ditur se çka cilësohet spastrim etnik është mirë t’i shkarkosh ata këshilltarë por është edhe koha me u dorëheq”, tha Bajrami.

Ndërsa, deputeti i PDK-së, Bekim Haxhiu, ka ngritur çështjen e mos investimit në stadiumin Adem Jashari në Mitrovicë, derisa ka kërkuar llogaridhënie nga Ministria e Kulturës, pasi sipas tij, klubet kosovare rrezikojnë të mos certifikohen në qershor për të luajtur në garat evropiane, si pasoj e infrastrukturës.

Ai tha se dy ligjet e miratuara në Kuvend nuk po zbatohen, madje as MKRS-ja nuk ka nxjerr udhëzime administrative për zbatimin e tyre.

Deputetja e pavarur Margarita Kadriu ngriti çështjen e humbjes së milionave që do t’i humbë shteti si pasoj e vendimeve të gjykatave të arbitrazhit. Derisa, kërkoi votimin e rekomandimeve të dala nga debati i organizuar muaj me parë pikërisht rreth kësaj çështje.

Në pikën jashtë rendit të ditës, pati edhe çështje tjera që u ngritën nga deputetët e Kuvendit. /GazetaBlic/