Hapet konkurs për esenë më të mirë nëpër shkolla

Debati në shkolla si formë e ngritjes së të menduarit dhe e shprehjes tek nxënësit do të aktualizohet këto ditë edhe me garën për debatin rreth Amerikës dhe përkrahjes së saj për të drejtat e shteteve të vogla sikurse Kosova.

Shoqata “Miqtë e Amerikës” ka shpallur konkurs për ese “Pse e dua Amerikën?”. Ky konkurs për esenë më të mirë rreth kësaj teme do të jetë i hapur deri më 15 maj, ndërsa përzgjedhja e fituesve do të bëhet më së largu më 20 qershor.

Të drejtën e konkurrimit e kanë të gjithë nxënësit e shkollave fillore dhe të mesme pa dallim nacionaliteti që ta shkruajnë një ese për këtë temë.

Agim Rexhepi, kryetar i shoqatës “Miqtë e Amerikës”, ka thënë për “Zërin” se kjo iniciativë është ndërmarrë duke e parë të nevojshme që gjeneratave të reja të lindur e rritur pas luftës t’u shpjegohet se cila ka qenë përkrahja amerikane gjatë historisë, e sipas tij, sidomos dhe kjo e pasluftës së fundit për Kosovën.

“I ftojmë drejtorët e arsimit të komunave, arsimtarët e profesorët, pa dallim nacionaliteti që t’i nxisin nxënësit të konkurrojnë në garën për ese”, ka thënë Rexhepi. Ai ka bërë të ditur se afati i fundit për dorëzimin e eses nga nxënësit është 15 maji i këtij viti.

Ndërsa eseja është vendosur që të jetë e shkruar në gjuhën angleze. “Teksti i shkruar nuk duhet të jetë më shumë se dy faqe a-4 apo dy faqe në word. Eseja nuk pranohet të jetë e shkruar në gjuhë tjetër përveçse në gjuhën angleze. Kurse zgjedhja dhe njoftimi i fituesve do të bëhet më së largu më 20 qershor.

Eseja duhet të përmbajë emailadresën, një numër kontaktues dhe në vend të emrit dhe mbiemrit të vendoset një kod (shifër), si për shembull data e lindjes, nga vetë autori.

Dhe në rast të përzgjedhjes do të kontaktohet për të dhëna të tjera”. Ai ka njoftuar se esetë duhet të dërgohen në emailin: friendshipkosovousa@gmail.com.

Vlerësimi do të bëhet në dy faza. Grupi i parë i komisionit i përzgjedh 20 (njëzet) punimet më të mira, ndërsa në fazën e dytë një komision tjetër i përzgjedh 10 (dhjetë) eset më të mira, që do tu jepet nga një mirënjohje.

Nga këto 10 të përzgjedhurat do të zgjidhen 3(tre) vendet e para të cilat edhe do të shpërblehen si në vijim:

Vendi i parë 250 Euro.

Vendi i dytë 150 Euro.

Vendi i tretë 100 Euro.