75 raste të dhunës në familje gjatë 2022-s në Podujevë

Komandanti i Stacionit Policor në Podujevë, Nijazi Jashari, ka njoftuar se gjatë këtij viti, në Komunën e Podujevës janë raportuar 75 raste të dhunës në familje. Në mbledhjen e Këshillit Komunal për Siguri në Bashkësi, të Komunës së Podujevës (KKSB), Jashari ka theksuar se në 30 prej këtyre rasteve, të dyshuarit janë në ndalim të policisë, në 22 raste ka urdhër mbrojtje për viktimat, dhe në 4 raste viktimat janë dërguar në strehimore.

Sipas njoftimit të Zyrës për media të Komunës së Podujevës, Jashari në këtë mbledhje ka folur edhe për punën e policëve të trafikut. Ai ka thënë se përgjatë këtij viti janë shqiptuar 9 mijë e 14 tiketa në trafik, ose rreth 30% më shumë se vitin e kaluar dhe janë konfiskuar më shumë se 175 vetura.

“Në bazë të vendimit të qeverisë për targat, stacioni i policisë ka qenë në angazhim 12 orë, dhe gjendja në Komunën e Podujevës po konsiderohet të jetë e qetë”, citohet të ketë thënë Jashari.

Sipas njoftimit, edhe përfaqësuesja e KFOR-it, gjendjen e përgjithshme të sigurisë në Komunën e Podujevës e ka vlerësuar të qetë dhe stabile, si dhe gjithashtu ka ritheksuar gatishmërinë e KFOR-it në ruajtjen dhe sigurinë publike.

“Drejtori i Drejtorisë për Shërbime Publike Mbrojtje dhe Shpëtim, Bahri Selimi, dha informatë për gjendjen e hapësirave publike kryesisht pas vërshimeve të fundit që kanë ndodhur. Ai ka treguar se Komuna e Podujevës ka ndërhyrë në lumin Llap dhe në lumin Kaçanoll, dhe në të gjitha vendet ku ka pasur nevojë që të intervenohet. Po ashtu Selimi ka treguar se Komuna e Podujevës ka një kod buxhetor për emergjencat dhe në bashkëpunim me kompanitë menjëherë kanë filluar intervenimet në mënyrë që dëmet të jenë sa më të vogla”, thuhet tutje në këtë njoftim.

Sipas zyrtarëve komunalë, komuna ka intervenuar në 16 vende në infrastrukturë rrugore dhe në dy fshatra ka intervenuar me prishjen e infrastrukturës rrugore, në mënyrë që të mos dëmtohen shtëpitë e banorëve, të cilat rrezikoheshin nga përmbytjet.

“Me vendim të anëtarëve është votuar që grupi punues për hartimin e planit të punës së KKSB-së për vitin 2023, të mbetet e njëjta përbërja e grupit të planit të punës me vitin 2022 po ashtu për formimin e grupit punues për përgatitjen e informatës për punën e KKSB-së për vitin 2022 të mbetet i njëjti grup punues që ka përgatitur informatën e mëhershme”, thuhet në njoftim./KOHA net/