550 vjetori i fitores se Skenderbeut, 50 arbereshe do te vijne ne Kruje me 22 prill

Shqiperia kete vit do te jete e mbushur me arbereshe. Atmosfera e Pashkeve te tyre, e cila lidhet ngushte  me imazhin e heroit kombetar Skenderbeut, do te perhapet edhe ketu.

Dy komuna arbëreshe nga Italia, Frashineto e Çivita, të përfaqësuara nga 50 burra, djem, gra, vajza, e fëmijë të veshur me kostume tradicionale do të vijnë në Shqipëri për të kujtuar 550-vjetorin e fitores së ushtrisë arbërore të Skënderbeut kundër ushtrive osmane.

Ky manifestim mban emrin ‘Vallja e Fitores’ dhe arbëreshët këtë festë e kanë praktikuar për më shumë se pesë shekuj pas shpërnguljes në Itali.

Kjo festë e trashëguar për më shumë se pesë shekuj është mjaft popullore në komunitetet arbëreshe dhe në çdo 24 prill festohet nga më i moshuari e deri te më i mituri.

Më 24 prill të vitit 1467, pas një rrethimi të tejzgjatur nga pushtuesit osman, pas shumë gjakderdhjesh nga të dy palët u shënua edhe fitorja e fundit e ushtrisë arbërore të udhëhequr nga Gjergj Kastrioti në Krujë.

Ndalni vajtimin për të rënët dhe shijoni gëzimin e fitores, ky ka qenë mesazhi i kësaj feste.

Grupi arbëresh do të mbërrijë në Shqipëri më 22 prill dhe pasdite do të shkojë do të shkojë në Krujë ku do të bëjnë edhe një vizitë në formë parade nga shtatorja e Gjergj Kastriotit, përmes Pazarit e deri brenda në Kështjellë.

Ditën e dytë, grupi do të bëjë homazhe te vendvarrimi i Gjergj Kastriotit në Lezhë, datë që përkon me ditëlindjen e Gjergjit, më 23 prill 1405 dhe ditën e martesës së tij me Donikën, më 23 prill 1451.

Pasdite, grupi do të vizitojë Kështjellën ‘Rozafa’ në Shkodër. Ndërsa ne datën 24 prill grupi do të vizitojë Lezhën, Kepin e Rodonit, Muzeun Arkeologjik dhe Amfiteatrin e Durrësit.

Me dëshirën që Vallja arbëreshe e  fitores të mbetet pasuri e folklorit kombëtar dhe të bëhet traditë e përvitshme edhe në Shqipëri, aktiviteti është mundësuar nga shoqata Foleja kombëtare e drejtuar nga Elida Jorgoni e më gjerë. Vallja e fitores në komunitetet arbëreshe festohet më së shumti pranë ditës së Pashkëve.