Udhëzimi administrativ që po pengon investimet e huaja në shëndetësinë kosovare

Shëndetësia kosovare vazhdon të përballet me probleme të ndryshme. Numri i pacientëve që vizitojnë spitalet në Maqedoni dhe Shqipëri vazhdon të jetë i madh. Një nga shkaqet që po ndihmon këtë realitet të hidhur është një udhëzim administrativ që pengon investimet e huaja në Kosovë, shkruan Indeksonline.

Udhëzimi 06-2015 neni 10 përcakton që investitorët e huaj që duan të hapin spital privat në Kosovë, duhet të kenë së paku dy mjekë specialistë vendorë. Ky udhëzim po shihet si barrierë për investitorët e huaj pasi që është pothaujse e pamundur që të ketë për secilin shërbim të ri spitalor nga dy mjekë specialistë vendorë.

Indeksonline e ka kontaktuar njërin nga investitorët e huaj i interesuar për hapjen e një reparti të ri mjekësor. Sipas tij, investimi është bllokuar pasi si rezultat i atij udhëzimi administrativ.

“Është e pamundur që të investojë pasi ky udhëzim i mbyllë të gjitha rrugët për të bërë një hap më tutje në këtë drejtim. Kam kontaktuar me shumë mjekë specialistë në Kosovë, por që është e pamundur të gjej pasi që të gjithë janë nëpunës në ndonjë spital tjetër. Udhëzimi më ka cënuar idenë për investim pasi që është e pamundur që të praktikohet në Kosovë duke e patur parasysh numrin e limituar të specialistëve në degë të ndryshme të mjeksisë. Kërkojë nga Ministria e Shëndetësisë dhe organet përgjegjëse që të rishikohet ky udhëzim dhe të ndryshohet pasi që do të jetë në të mirë të të gjithëve” ka thënë i interesuari për investim në kushte anonimiteti.

Nuk është vetëm ky personi i vetëm i interesuar për të investuar në sektorin e Shëndetësisë. Indeksonline mëson se ka edhe individë tjerë të interesuar për të investuar por si rezultat i udhëzimit të cekur me lartë është pamundësuar investimi në këtë sektor mjaft të rëndësishëm për qytetarët e Kosovës.

Portali ‘Indeksonline’, ka provuar të marrë qëndrimin edhe të Ministrisë se Shëndetësisë për të kuptuar nëse e kanë në plan të punojnë në ndryshimin e këtij udhëzimi, por asnjëri nga zyrtarët e kontaktuar nuk i është përgjigjur interesimit tonë./PodujevaPress/