2€ të falsifikuara me të madhe: Si e kapën Prokuroria e Policia grupin e dyshuar me 85 mijë euro në total?

Prokuroria Speciale e Kosovës në bashkëpunim me Policinë, kanë arritur të kapin një grup prej 6 personash të cilët dyshohej se merreshin me shpërndarjen e monedhave 2 euro fals.

Gjatë aksionit, Prokuroria Speciale e Kosovës ka bërë të ditur se janë kapuar thasë me monedha të falsifikuara, vlera e të cilave në total shkon mbi 85 mijë euro.

Sipas Prokurorisë, monedhat prodhoheshin në një nga vendet e rajonit e më pas shpërndaheshin.

“Prokuroria Speciale e Republikës së Kosovës (PSRK), dhe Policia e Kosovës, Drejtoria për Hetimin e Krimeve Ekonomike dhe Korrupsionit, ka realizuar një operacion gjatë të cilit është identifikuar një grup i cili merrej me prodhimin/shpërndarjen dhe futjen në treg të parave të falsifikuara, të cilat dyshohet se janë prodhuar në një shtet fqinj me Kosovën, dhe me pastaj nga grupe kriminale shpërndahen në shtetet e rajonit”, thuhet në njoftim.

Tre nga të arrestuarit janë shtetas të Maqedonisë së Veriut e tre të tjerë të Kosovës.

 “Prokuroria Speciale njofton se në këtë operacion janë arrestuar në flagrancë gjashtë (6) persona të dyshuar, për veprat penale ‘’Falsifikimi i parasë (prodhimi dhe vënia në qarkullim) nga neni 296 i Kodit nr.08/L-074 të Kodit Penal të Republikës së Kosovës, pasi që të njëjtit kanë qenë shpërndarësit e parave të falsifikuara, konkretisht monedhave metalike dy (2) €uro të falsifikuara. Ndërkaq, tre (3) nga personat e dyshuar janë shtetas nga Maqedonia e Veriut, dhe tre (3) të tjerë shtetas të Kosovës”, thuhet në komunikatë.

Gjatë aksionit janë sekuestruar edhe katër vetura dhe 7 telefonë.

 “Nga ky operacion janë sekuestruar thasë me nga 2 €uro metalike në vlerë prej tetëdhjetë e pesëmijë e dhjetë (85.010.00) euro, të cilat dyshohen se janë të falsifikuara. Po ashtu, janë sekuestruar katër (4) vetura të cilat janë përdorur nga personat e arrestuar dhe shtatë (7) telefona celularë. Personat e arrestuar me aktvendim të Prokurorit të Shtetit, janë dërguar në mbajtje për 48 orë, si dhe brenda afateve kohore ligjore do të bëhet kërkesë për caktimin e masës së paraburgimit”, thuhet në njoftim.

Kohëve të fundit monedhat 2 euro janë shpërndarë me të madhe nëpër Kosovë. Si rezultat shumë qytetarë janë ankuar se në shumë biznese ato monedha nuk po pranohen fare.

Ky është një nga aksionet më të mëdha për kapjen e grupeve që shpërndajnë monedha të falsifikuara.

Prokuroria Speciale pritet të kërkojë 30 ditë paraburgim, për të cilën kërkesë pritet vendimi i Gjykatës.