245 raste aktive me COVID në Podujevë, a do të kthehet nesër në zonën e kuqe kjo komunë?!

Epidemiologia e vetme në Podujevë, Bedrije Rama ka theksuar se në dy javët e fundit trendi i të infektuarave është në rritje dhe gjendja e tyre është më e rëndë.

Doktoresha Rama thotë se numri total i të prekurve me Covid-19, është 3 mijë e 375, ndërsa aktiv janë 245. Betejën me Covid-19, sipas saj, e kanë humbur me këtë sëmundje deri tash 47.

“3 mijë e 375 është numri total, të shëruar janë 3 mijë e 83, të vdekur 47 dhe aktiv janë 245. Gjendja e këtyre që janë aktiv në dy javët fundit janë me simptoma më të rënda, prej tyre kemi edhe në spital, por shumica e tyre janë duke u trajtuar në shtëpitë e tyre me një gjendje mesatare të sëmundjes… Në dy javët e fundit (numri I të infektuarve) është në rritje”, thekson Rama.

Numri total i rasteve pozitive në Kosovë është 79.089 raste nga 366.574 persona të dyshimtë në virusin SARS-CoV-2 dhe 1.731 raste të vdekjes. Brenda 24 orëve të fundit kanë rezultuar 709 raste pozitive dhe janë raportuar 8 raste të vdekjes me SARS CoV-2 pozitiv.