21 ton lëng portokalli me afat të skaduar tentojnë të hyjnë në Kosovë, përfshihet kompania nga Podujeva Laberion Dona

Një sasi prej 21,280 kilogramësh koncentrat për pije (lëng portokalli – 65 përzierje aseptike konvencionale) është ndaluar në kufi pasi rezultoi me afat të skaduar.

Sipas njoftimit të Agjencia e Ushqimit dhe Veterinarisë (AUV), produkti ishte eksportuar nga kompania Prodalim BV nga Rotterdami i Holandës, ndërsa në Kosovë ishte importuar nga Laberion SH.P.K. me seli në Podujevë.

Pas kontrollit të dokumentacionit dhe inspektimit fizik nga Inspektorati Fito Sanitar, autoritetet konstatuan se koncentrati kishte kaluar afatin e përdorimit, duke çuar në ndalimin e menjëhershëm të hyrjes së tij në Republikën e Kosovës.

Në përputhje me legjislacionin në fuqi për sigurinë ushqimore, produktet me afat të skaduar paraqesin rrezik serioz për konsumatorët dhe ndalohet kategorikisht importimi i tyre.

Ministria e Bujqësisë, Pylltarisë dhe Zhvillimit Rural ka theksuar se përmes AUV-së do të vazhdojë kontrollet e rrepta në zinxhirin ushqimor, me qëllim garantimin e sigurisë ushqimore dhe mbrojtjen e shëndetit publik në vend.