150 të arrestuar në Prizren për manipulime zgjedhore, pas rinumërimit pritet reagim edhe në Podujevë

Sot në Rajonin e Prizrenit janë arrestuar 150 persona për manipulime me vota në zgjedhjet parlamentare të 28 dhjetorit 2025. Arrestimet janë kryer me urdhër të Prokurorisë së Prizrenit dhe janë rezultat i verifikimeve zyrtare të procesit zgjedhor.

Të dhënat për parregullsitë janë të publikuara në faqen zyrtare të Komisionit Qendror të Zgjedhjeve. Sipas këtyre të dhënave, janë konstatuar shkelje serioze që lidhen me votimin dhe administrimin e materialit zgjedhor.

Parregullsi të theksuara janë evidentuar edhe në Podujevë. Nga gjithsej 110 kuti të votimit, në 11 prej tyre KQZ ka evidentuar keqpërdorime të mëdha, të cilat tashmë janë pjesë e procesit të rinumërimit.

Meqenëse rinumërimi ende nuk ka përfunduar, mbetet e hapur çështja nëse pas verifikimit të plotë do të ketë reagim institucional edhe në Podujevë, përfshirë masa hetimore apo arrestime të mundshme.

Podujevapress.net do të vazhdojë ta ndjekë procesin dhe do t’i informojë lexuesit me zhvillimet e reja sapo ato të bëhen zyrtare.