127 raste aktive me koronavirus në Podujevë

Numri i rasteve aktive me koronavirus është duke u rritur dukshëm në Podujevë, vetëm gjatë 24 orëve të fundit janë konfirmuar 26 raste të reja.

Epidemiologia Bedrie Rama ka thënë për Gazetën Sinjali që së fundmi janë testuar 38 persona dhe prej tyre 26 kanë rezultuar pozitiv.

“Po ka shënuar rritje numri i rasteve me COVID-19 ditëve të fundit. Kanë dal rezultatet për dy ditë do të thotë për 28 edhe 29 korrik. Janë testuar 38 persona, 26 prej tyre kanë rezultuar pozitiv”.

Ajo ka thënë se janë 127 raste aktive me koronavirus në Podujevë dhe shumica nga ta janë duke u trajtuar në shtëpitë e tyre.

“Numri total i rasteve aktive me koronavirus është 127. Në Klinikën Infektive kanë qenë dy persona, njëri person është liruar”.

Dy vdekjet e fundit nga koronavirusi në Podujevë janë konfirmuar pasi janë varrosur viktimat.